FIRDAUS: Agace ka 40

Maurice: None se cherie, uzasigara hano kugeza ikiriyo kirangiye cyangwa turasubirana muri Kenya?
Firdaus: Ahubwo numvaga naguma hano burundu. Sinshaka ko na mama yazapfa nka papa akeneye ko muba hafi
Maurice: Ubu se tubigenze dute? Gusa nanjye ndumva bikwiye kugumana na mama, akeneye umuntu umuba hafi akamuhumuriza, nanjye kandi mfite gusubira mu rugo, hari byinshi nshaka kuvugana na mama. Ndabona ubukwe bukwiye kwihuta kurenza uko nabitekerezaga.
Firdaus: Ntacyo ndaguha urufunguzo rw’iwanjye uzabifunga ubihe indege izabizana njye kubifata. Gusa nzakumbura ba Ines na Calema na Keila nako ni benshi pee.
Hashize iminsi itatu dushyinguye papa. Ni urupfu rwatubabaje, gusa ku rundi ruhande nashimishijwe nuko nabashije kumushyingura kandi byibuze yapfuye tumaze kwiyunga. Mama ntarabasha kubyakira, dore ko apfakaye akiri muto, kandi nta wundi mwana babyaranye. Niyo mpamvu mbona nta mpamvu yo gukomeza kuba muri Kenya, amasomo nzayakomereza hano, ndi hafi ya mama.
Maurice yasubiye muri Kenya, nyuma y’icyumweru anyoherereza ibyanjye byose byari muri kenya. Iterambere ryarabyoroheje, inshuti zanjye zose tuvugana kuri terefoni, twakumburana cyane tukavugana turebana.
Ines ni we tuvugana cyane kandi kenshi dore ko nubu mufata nka mukuru wanjye, kuko inama ahora ampa zingirira akamaro cyane mu buzima bwanjye.
Samson ubu ni inshuti y’umuryango, adusura kenshi kandi mwifashisha mu byo ntabasha kwikorera dore ko nanabonye afitanye umubano udasanzwe na Maurice
Byibuze gatatu ku munsi mvugana na Maurice kandi rwose urukundo rwacu rwarakomeye, dore ko nta cyo mushinja na we kandi nta na kimwe.
NYUMA Y’UMWAKA
(Muri Kenya)
Maurice: Ariko se mama urabona indege itari budusige koko? Kuki wikerereza uzi ko indege ikorera ku masaha?
Mama Maurice: Mwana wa, ihangane ndarangije. Sinshaka kuza kugaragara nabi imbere ya bamwana wo gacwa we. Unamenye ko benewanyu kandi baba bahari, batabona ko nageze Kenya ngacupira. Ahubwo se Ines yahageze ngo tugende?
Maurice: Ntuzi wowe ibyo Ines yankoze. Yageze mu Rwanda kareeee. Buriya ngo ari ku ruhande rw’umukobwa. Ngo ni we uri bube fille d’honneur. Turamusangayo. Ngaho tugende dore ndabona Keila ari kumpamagara buriya ari hasi aradutegereje
(Mu Rwanda)
Ines: Shahu iyo kanzu wambaye irakubereye weee. Numva mfite agashiha
Firdaus: Koko se? Erega shahu ubukwe ni ibirori biza rimwe mu buzima.
Ines: Ese muzatura hehe? Hano cyangwa ubukwe niburangira muzasubira Kenya?
Firdaus: Sha Maurice yambwiye ngo turafata icumbi ry’ukwezi kwa buki, ngo tuzabiganira muri uko kwezi, nikurangira tuzaba twamaze kwemeza aho tuzaba. Reba ariko ukuntu mama umukenyero umubereye. Shahu ndumva nishimye ntiwabyumva
Ines: wishimiye kurongorwa se cyangwa uko mama yambaye
Firdaus: Nishimiye ko izina ribaye muntu. Najyaga numva iri zina nzarihinduza kuko ubuzima bwanjye nta juru nabonagamo, numvaga ari ukuzimu gusa. Ariko kuva nahura na Maurice nihorera muri Firdaus gusaaaa. Mbese sinzi
Twari turi kuganira nibwo Samson yazaga
Samson: Mabuja ibintu mwanshinze byose ubu biri ku murongo. Salle iratunganyije, ibyo kunywa tayari, ababitanga bahageze, mbese nta kibura. Imodoka na yo bambwiye ko ubu bageze ku kibuga bategereje indege, mu masaha atarenze abiri uraba umanitse incakwaha
Ines: Kumanika incakwaha ni ibiki se kandi?
Firdaus: Ni ukumanika akaboko uvuga amasezerano
Twese twaraturitse turaseka. Disi Samson ni umwana mwiza peee.
Twakomeje imyiteguro, kugeza ubwo twumvise imodoka izanye Maurice ihageze
Ibirori byacu by’ubukwe byarimo ibice bitatu. Babanje gusaba no gukwa, duhita twerekeza ku murenge gusezerana imbere y’amategeko, tuhava twerekeza mu cyumba cyo kwakiriramo abashyitsi. Aha ni ho twanaherewe umugisha mu rwego rw’itorero. Impamvu tutigeze tugira urusengero tujyamo ni uko Maurice nta torero ryo mu Rwanda abarizwamo, nanjye kandi nta dini na rimwe nahaga agaciro kurenza irindi. Icyo twakoze twashatse umwe mu banyetorero tumusaba ko yazaza akadusengera mu bukwe bwacu, na we arabyemera.
Mu birori byo gusaba no gukwa no ku murenge twari twambaye bisanzwe, nambaye ikanzu naho Maurice we yambaye imyenda idoze mu buryo buvanze kinyarwanda na kimasayi, mbese yari yahuje umuco yavukiyemo n’uwo yakuriyemo.
Mu kwakira abantu nibwo yambaye ikositimu nziza cyane y’ubururu nanjye nambara agatimba, ibirori byagenze neza cyane.
Ababyeyi bacu twembi dore ko twembi dufite ba mama gusa bari bizihiwe kandi bishimye cyane, gusa mu kwakira abashyitsi mama ntiyahageze ngo burya ntawe utaha ubukwe bw’umukobwa we. Sinzi impamvu ariko ngo niko umuco nyarwanda uvuga.
Keila na Zahara bari babukereye bambaye amakanzu meza cyane, aho Keila yari atwaje Maurice indabo yampaye naho Zahara we amutwaje impano yahaye mama, mu muhango wo gukwa.
Ibirori byose birangiye, twinjiye mu modoka, jyewe, Umugabo wanjye, Samson, Ines na Zahara. Keila na mama Maurice bo bari bagiye aho bafashe icumbi bari burare bagasubira Kenya bucyeye
Tugeze aho twari kurira ukwezi kwa buki nasanze ari inzu nziza, ifite ubusitani bunini burimo ibiti by’imbuto, ahantu rwose ho kuruhukira ugatuza.
Twinjiyemo, Samson aratwakira, atwereka icyumba cyacu, ampa imfunguzo ati ni wowe nyiraho, ni karibu.
Ba bakobwa bo bagiye mu cyumba cyo mu gikari.
Tugeze mu cyumba nasanzemo ifoto yanjye nini cyane imanitsemo, ndatungurwa nuko mbaza Maurice
Firdaus: Iyi foto se yageze hano ite cheri?
Maurice: Ni Samson byose wabikoze
Firdaus: Ubu se iyi nzu ntihenze koko? Iyo ureka tugashaka inzu ikodeshwa macye cheri? Utangiye gusesagura koko?
Maurice: Cherie, narabiguhishe kuko nashakaga kuguha impano iruta izindi nigeze kuguha. Iyi nzu ni iyacu. Samson ni we wayubakishaga, niyo mpamvu wabonaga turi inshuti cyane. Humura ntawe uzatwishyuza, kandi ntabwo nzasubira muri Kenya nanjye, tugomba kuba hafi ya mukecuru, akazasaza neza.
Numvise ibinezaneza binyirukanse umubiri wose, amarira y’ibyishimo atemba ku maso.
Burya koko Imana ishobora guhindura amateka. Nibutse akumba nararagamo, nkagereranya n’icyumba ndimo. Nibutse inkoni za buri munsi nzigereranya n’umunezero ndimo.
Imana niyo nkuru.
IHEREZO


Ndabashimira ko mwakurikiye iyi nkuru ndetse n’izindi zayibanjirije. Gusa ndisegura ku kuba itaragiye isohoka neza, ariko si ukubishaka ahubwo byaterwaga n’impamvu zinyuranye zaba iz’umubiri cyangwa akazi. 

Iyi nkuru ndizera ko isize amasomo akomeye muri twe. Kwihangana, kubabarira, kwizera, kwihana no gusaba imbabazi, urukundo nyarwo, ni bimwe mu byabonetsemo.

Gusa nabamenyeshaga ko ku bajyaga babona link y’iyi nkuru n’andi masomo kuri whatsapp, hagiye kubaho impinduka ariko zitari mbi. Kuko benshi bagenda batayabona rimwe na rimwe, hari uburyo bundi nshaka kuzajya mbagezaho inkuru ndende, noneho atari link, ahubwo ari inkuru yose. Nzababwira uko bizakorwa.

Murakoze

Umwanditsi Francois Jassu BIRAMAHIRE

FIRDAUS: Agace ka 39

Yadufashe mu biganza, buri umwe akaboko kamwe, nuko bimugoye, aratubwira
Papa Firdaus: Bana banjye, iminsi yanjye yo kuba kuri iyi si iri kugana ku musozo. Mbabazwa nuko ntayibaniyemo neza umwana wanjye Firdaus, imfura, ikinege, uwatumye nitwa papa. Imyumvire yanjye mibi yanteye gukora ibimeze nko kwihekura, nibabariza umwana ku busa, namwise amazina adakwiye, ngaho ngo ni umuteramwaku, umwana wa Sekibi, dayimoni n’andi mabi menshi. Nishyiragamo ko ari we watumye ntabona urubyaro, ariko ubwo nageraga hano ndwaye abaganga bambwiye ko ndi muzima ahubwo basuzumye nyina basanze amaraso ye ari yo atuma inda asamye zivamo, kuko atigeze ahabwa umuti ubwo yabyaraga umwana wa mbere, kuko mfite Rhesus positif we akagira Rhesus negatif. Bana banjye kubimenya nubwo byatumye menya impamvu ariko nanone byanyongerereye intimba kuko nasanze umwana wanjye narakabije kumurenganya. Rero bana banjye, imbere y’umugore wanjye n’imbere y’Imana mbasabye imbabazi mbikuye ku mutima. Imana yo namaze kuziyisaba, kandi ndabizi neza yarambabariye, kuko nayisabye ko niba imbabariye itazareka nsubira munda y’isi ntongeye kubona umwana wanjye. None ndamubonye kandi simubonye wenyine mubonye ari kumwe n’undi mwana wanjye, uzasigara mu mwanya wanjye amwitaho. Bana banjye rero mbasabiye umugisha w’iburyo n’uw’ibumoso, mbasabiye Imana ngo izabahe kuzuza ibigega, muzatunge mutunganirwe. Muzabyare hungu na kobwa, muzagwize inshuti n’imiryango mwagure imbago mugere kure.
Yaraturekuye, nuko areba Maurice, amushyira ibiganza mu mutwe
Papa Firdaus: Ndagutongereye imbere y’umuryango, numfatira umwana nabi uzabiryozwe n’abazagukomokaho. Uzamfatire umwana neza, umuteteshe, urukundo ntamuhaye ngusabye kuzarumuha ndetse ukanarurenza. Uzamubere umugabo ukwiye, umutware nyawe w’urugo, umufasha, ruvumera, rukaragandekwe rutikura. Umwana wanjye uzamurinde umushiha wa nijoro umurinde irungu rya ku manywa.
Yaramurekuye, nanjye arongera amfata mu mutwe
Papa Firdaus: Mwana wanjye uzakunde umugabo. Uzamugaburire indyo akunda kandi ku gihe. Uzamurerere neza abazabakomokaho. Uzamusasire neza umurinde gushaka ibindi bisasiro. Ntuzatume yicuza icyatumye agukunda ahubwo urugo rwanyu ruzatambemo imitavu, muzagire inka n’inkari.
Yamaze kuvuga ayo magambo, arongera araryama, ubona ku maso he hacyeye.
Maurice: Mubyeyi urakoze ku mpanuro uduhaye, gusa humura uraza gukira vuba, abaganga batwijeje ko imiti uri gufata izatuma umererwa neza vuba. Gusa inama zawe tuzazubahiriza kandi tuzazikurikiza zose uko zingana
Firdaus: Papa. Narakubabariye kandi ndashimira Maurice imbere yanyu kuko iyo ataba we, nta nubwo nari kuzatekereza kugaruka hano. Ibyo yababwiye ubwo aheruka ino byose yarababeshyaga, ahubwo yashakaga ko mumenya uburemere bw’ikora ryanyu, kandi nshimira Imana ko byatumye mwihana. Ari wowe, ari mama, mwese narababariye kandi rwose nzababera umwana. Nanjye ndabasaba imbabazi kuko nagiye ntavuze, ngenda mbibye amafaranga ariko nabonaga nta yandi maherezo kuko intimba yari igiye kuzanyica. Murabizi nagiye ntakivuga ariko ubu ndavuga, nungutse inshuti, mfite akazi, kandi mu minsi micye ndasoza amasomo ndetse mwanamubonye Maurice ni we tuzashingana urugo. Rero nzaharanira gushyira mu bikorwa inama zanyu kandi murakoze
Mama Firdaus: Mwana wanjye erega nta cyaha wakoze kuko watwaye ayagombaga kugufasha, ahubwo wanatwaye macye. Mwana wa, intimba jyewe sinzi niba izamvamo kuko imyaka yose nakureze ubu ni bwo nkubonye wishimye, utuje uganira. Nibwo nkubonye ntafite icyo ngushinja imbere ya so ahubwo mfite icyo nishinja mu mutima wanjye. Imana yakurinze izakomeze ikurinde uzabone abana, abuzukuru n’ubuvivi kandi ibibero byawe bizahoreho ibibondo.
Twakomeje kuganira bisanzwe, kugeza ubwo muganga yagarutse gusuzuma adusaba kuba tugiye hanze, nuko turasohoka. Tugeze hanze ni bwo Maurice yahamagaye Samson, nuko araza baragenda na njye nsigarana na mama. Nk’umwana na nyina, ni bwo bwa mbere twicaranye ngo tuganire, nubwo twari duhuriye mu bihe bibi ariko nanone ni bwo bwa mbere numvise nisnzuye kuri mama, numva neza rwose ko ndi kumwe n’umubyeyi.
Mama Firdaus: Niko se mwana wa, uriya musore mumaze igihe mukundana?
Firdaus: Yego mama. Kuva nagenda ni bwo twamenyanye urumva ko tumaze hafi umwaka dukundana.
Mama Firdaus: None se ko avuga neza ikinyarwanda?
Firdaus: Buriya ngo afite inkomoko mu Rwanda, nubwo yakuriye muri Kenya ariko ababyeyi be ni abanyarwanda. Nanjye mbimenye vuba ariko. None se mama papa basanze arwaye iki
Mama Firdaus: Sha nanjye ibya so byaranyobeye. Abaganga basuzumye ibizami byose bishoboka ariko basanze nta ndwara n’imwe arwaye mu zo bacyekaga. Gusa bambwiye ko bakurikije ibyo baganira iyo bamusuzuma ngo ashobora kuba afite ikibazo kiremereye yananiwe kwakira, bityo bikaba byaratumye umubiri we ucika intege ubudahangarwa bwe bukagabanyuka. Buriya muganga iyo aje gusuzuma aba aje kumuganiriza, ni yo mpamvu atindamo. Sinzi rero nanjye ubwo hagati aho ikibazo nyamukuru yahuye na cyo, ariko nkeka ko biterwa nuko yananiwe kwakira ubuhemu twakugiriye, kuko byamufashe ubwo uriya musore yavaga ino.
Firdaus: Birashoboka disi buriya yananiwe kwiyakira kandi nukuri naramubabariye pee. Gusa nyine azakira ubwo buriya ambonye kandi akaba amenye ko namubabariye. Ariko se mama, uriya musore waramushimye nawe?
Mama Firdaus: Mwana wa, uriya musore naramushimye ni imfura. Uburyo byonyine yadukuyemo amakuru, kandi agasiga atweretse ko azi aho uri, byatumye ndushaho kumukunda. Buriya umuntu ugukunda bya nyabyo yihatira kumenya ibyawe byose kandi aharanira kumenya umuryango wawe, akamenya byinshi bikwerekeye. Rero namushimye burya, sinamugaya ubu.
Twakomeje kuganira na mama kugeza ubwo Samson na Maurice bazaga, na bo dukomezanya ikiganiro. Samson yakomeje kurata Maurice cyane imbere ya mama amwereka uburyo abonye umukwe uzi gukora, mwiza, witonda kandi ukunda umukobwa we. Ikiganiro cyari kiryoshye twanibagiwe ko turi kwa muganga aho dufite indembe.
Tukiri kuganira, ni bwo muganga yasohotse, ansaba ko jyewe na mama twenyine twinjira kuko papa adushaka.
Twarinjiye, dusanga papa aryamye agaramye, nuko turamwegera
Papa: Mwana wanjye, wakoze kugaruka mu rugo, uzakunde nyoko nubwo we atakubereye umubyeyi kandi uzamusazishe neza
Mubyeyi nawe, imyaka ushigaje uzereke umwana urukundo, kandi ibyo utamukoreye akiriho, uzabikore ubu ndetse urenzeho, uzamubere byose, kandi uzambere aho ntari
Yabivugaga ubona arwana n’umwuka, nuko amaze kuvugana na twe, arambika amaboko mu gatuza, arahumiriza.
Mama yahise asakuza arira, jyewe sinari nzi ibyo ari byo, nuko Maurice yumvise mama arize ahita yinjira bwangu, agikubita amaso aho papa aryamye ahita asakuza nawe cyane ati “Oyaaaaaaa we, widusiga”
Ese umusaza arapfuye? Yoooo!!!!

Biracyaza….

FIRDAUS: Agace ka 38

Samson: Yewe papa we ubu ari mu bitaro, kandi rwose ararembye pee. Ejo nibwo nabyumvise ngo amaze ibyumweru bibiri mu bitaro ngo kandi nta koroherwa.
Maurice: Waba se uzi neza aho arwariye? Ese uko ubona bafite ubushobozi bwo kuba bakishyura imiti, cyangwa se ikindi bakeneye kugura?
Samson: Yewe simbizi neza, keretse ahari ngeze ku bitaro nkamenya neza uko bimeze. None se ikibanza ubwo bimeze bite?
Maurice: Wowe urumva umuntu arembye ukazana ibibanza? Ahubwo ndaje nkoherereze amafaranga, ujye kumusura unamenye neza amakuru ye, urare umbwiye nanjye ndakubwira icyo gukora nyuma yaho. Si byo?
Samson: Boss nta kibazo rwose. Ariko numvaga wanatekereza uko wazaza kureba ikibanza, ukanamusura. Sinzi uko ubyumva
Maurice: Nyine nibyo nkubwira, ariko banza umenye amakuru yuzuye, ibindi bindekere
Yarakupye, nuko Maurice ahita ajya aho boherereza amafaranga ahita amwoherereza ayo gukoresha ajya kureba uko uyu musaza amerewe.
Amaze kuyabona yaramubwiye, na we ahita yitegura kujya kumureba.
Maurice yasigaye ubona yataye umutwe, yayobewe icyo gukora n’icyo kureka, kuko uwo ni uzamubera sebukwe, urwaye. Yibajije niba ahita abibwira Firdaus cyangwa aba amwihoreye akabikora bucece, ariko nanone yibaza umusaza aramutse apfuye, niba ataba abaye imfura mbi. Gusa yarindiriye ko Samson abanza kumuha amakuru afatika, na we akabona uko abwira Firdaus
Nka nyuma y’amasaha abiri yabonye Samson amuhamagaye, amubwira ko yasanze umusaza arimo serumu, atabasha kubyuka, gusa abasha kuvuga buhoro, ariko arwariye mu ndembe. Yanamubwiye ko yasanze bafite ubwishingizi bwo kwivuza ariko butabishyurira imiti yose, bityo hari imiti bigurira muri farumasi, cyane cyane iyo kumutera kandi ihenze, dore ko yaterwaga gatatu ku munsi
Yamubajije niba yaba yamenye icyo arwaye amubwira ko byo atabashije kubimenya na cyane ko umukecuru we ari na we umurwaje, bataziranye cyane.
Yahise yumva ko nta yandi mahitamo agomba kujya kureba uwo musaza gusa yumva ari ngombwa ko yajyayo abanje kubimenyesha Firdaus.
Yahise ahamagara Firdaus amubaza niba ari mu rugo, undi amubwira ko ariho ari, ahita amubwira ko agiye kumureba
Agezeyo
Firdaus: None se cheri ko mbona umeze nk’ufite ibibazo wabaye iki?
Maurice: Sha ndeka ubu nataye umutwe. Ahubwo mbwira, kugera mu Rwanda ugiye na bisi byatwara amasaha angahe?
Firdaus: Ushaka se kujya gukora iki mu Rwanda?
Maurice: Sha nshaka kujyayo byihutirwa, kandi ndumva nshaka ko tujyana. Rero gutega indege twese byahenda cyane, kandi dufite kuzigama ayo kuzifashisha
Firdaus: Urabura kumbwira impamvu none uravuga ngo bisi, indege
Maurice: Sha, ubwo navaga iwanyu hari umusore nasigiye nimero, ajya ampa amakuru yaho. Rero yampamagaye ambwira ko papa wawe arwaye bikomeye ari mu bitaro. Ndumva tugomba kujya kumusura, tukanareba niba hari ubufasha banakeneye tukabubaha
Firdaus: None se kumusura uraba ugiye kumuvura? Erega nubwo nabababariye ariko hari ibyo ntarabona ko nakora
Maurice: Nubabarira jya ubikora byose. Ibaze aramutse apfuye utamubonye? Kandi wajya gushyingura waranze kumusura ari muzima. Iki ni cyo gihe ahubwo cyo kumusura akanabona ko wamaze kumubabarira. Kukubona ubwabyo, ni ikimenyetso cy’uko wamubabariye kandi byamufasha kuba yakira vuba. Burya abasaza bagira imitima yoroshye wanasanga kumenya amakuru yawe ari byo byatumye aremba.
Firdaus: Yewe cyakora ni byo uri mu kuri. Bisi inyura Uganda ni yo igerayo vuba, ubwo ni yo twafata. Indege wa mugani yahenda. Gusa ubwo tuzakoresha iminsi ibiri kugerayo. Sinzi niba atari myinshi rero ku muntu wavuze ko arembye anakeneye ubufasha bwacu
Maurice: ndumva ari harehare. Ibintu birashakwa reka dukoreshe indege. Itegure reka nanjye nkoreshe reservation ku kibuga, ubwo turanyura mu rugo tujyane na Ines, aze kugarura imodoka azanaze kudutwara tugarutse.
Twahise twitegura urugendo, gusa numvaga nanjye natangiye kugira ubwoba. Hashize hafi imyaka ibiri ntabona papa, nubwo bampemukiye bakamfata nabi ariko koko ni ababyeyi kandi sinkwiye kumera nka bo ngo mbiture ibibi bankoreye. Mu ndege nagiye mbunza imitima, nibaza byinshi. Uko ari bwifate nambona, uko mama ari bumere, gusa byose byari nk’agashya kuri jye
Mu gihe kitarambiranye twageze ku kibuga cy’indege duhita dufata tagisi igana ku bitaro yari arwariyeho. Mu kugenda twitwaje imbuto, n’ibindi umurwayi akenera nka juices n’ibindi.
Ubwo twageraga kwa muganga, Maurice yari yahamagaye Samson kugira aze kudufasha mu bindi turi bukenere. Samson akinkubita amaso, yahise angwamo, nubwo tutavuganaga kenshi ariko nari muzi, yari umusore nabyirutse andeba. Anshuhuje yumvise mwikirije biramutungura, mpita nibuka ko navuye mu Rwanda ntavuga. Nahise nibaza niba na mama ndi bumuvugishe cyangwa ndi bumwihorere ariko nanone numvaga ngomba kuvuga, na byo bikarushaho kongera ibyishimo
Samson yaratujyanye atugeza aho papa arwariye. Twasanze harimo umuganga kuvura, dutegerereza hanze y’icyumba.
Sinari nzi ko mama yabaye asohotse, nuko tukiri aho mbona aturutse imbere yacu. Akidukubita amaso, yaje yiruka angwamo maze twembi amarira y’ibyishimo atubunga mu maso. Twararebanye, mama arandeba arampindukiza, ankandakanda hose, arongera angwamo.
Mama Firdaus: Kiragi mwana wanjye uraho?
Firdaus: Uraho mama. Sinkiri kiragi nsigaye mvuga
Byaramutunguye, gusa yibutse ko ari bo bari baratumye ndeka kuvuga, amarira aramushoka angwamo aratsikimba. Byari ibintu bitangaje kubona umubyeyi arira imbere y’umwana we, gusa byari ngombwa. Ubanza ataranibukaga ko Maurice ahari na we, nuko kera kabaye, na we aramusuhuza. Gusa yamushuhuje ubona afite amakenga nk’aho yamenye ko ari hafi kumubera umukwe.
Twagumye aho ntawe uvuga, ari ukundeba, akongera akankorakora, nuko muganga avuye gusuzuma atubwira ko twakinjira noneho ariko tutemerewe gutindamo
Twibajije niba twinjira twese, ariko Maurice ambwira ko abanza akinjira, agateguza umusaza
Barinjiye we na mama, nuko mu minota nk’itanu Maurice araza ambwira ko nakinjira
Narinjiye, nkubise amaso papa, ikiniga kiramfata, mpita mfukama imbere y’igitanda cye mwubararaho byo kumuhobera, na we ampfumbatisha ukuboko nuko akajya ankandagura, maze kuruhura umutima ndahaguruka. Muhereza umukono, maze nicara hafi ye. Yasabye mama kumufasha kweguka, nuko asa n’uwicara, maze ansaba kuzana ibiganza byanjye akagira icyo ambwira.
Narabimuhereje, abifatamo, amaze akanya azunguza umutwe, yitsa umutima
Papa Firdaus: Uyu musore se murakundana
Firdaus: Yego turakundana
Papa Firdaus: Mwana wa, nawe igira hino mwese mbahere umugisha hamwe, kuko aya mahirwe sinzongera kuyabona. Imbabazi zo namaze kuzisaba, ndetse Imana ishubije amsengesho yanjye kuko itumye mbabona ntarapfa. Mwegekeho urugi, ibyo ngiye kuvuga ni ibanga ry’umuryango gusa ntawundi ugomba kubyumva.
Twegetseho umuryango nuko dutega amatwi ijambo ry’umubyeyi
Uyu musaza se ko wagirango agiye kuraga?
Biracyaza…

FIRDAUS: Agace ka 37

Firdaus: None se ko utavuga?
Maurice: Numvaga wacecetse. Washoje amasomo se ko tuje aho ku ishuri
Firdaus: Yego twashoje. None se nimero ya Keila kuki ari yo ukoresheje
Maurice: Yari yaje mu rugo kunsaba imbabazi, mbona isaha zigeze ntaragura unite ngo nguhamagare, nuko nkoresha iye. Kandi turazana yambwiye ngo aragukumbuye na we
Firdaus: Ni karibu rwose nta kibazo. Murasanga mpagaze hahandi ujya unsanga nk’ibisanzwe.
Yarakupye, nanjye nari ndi gusohoka, nuko ntaragera hanze mbona Aziz yankurikiye
Aziz: Ese mwana kuki utakinansuhuza hari ikosa nagukoreye
Firdaus: Oya ntaryo ahubwo mba ngirango uhe umwanya uhagije Calema kandi aragukeneye bihagije
Aziz: Wamenye ute se ko ankeneye wowe? Gusa disi mbona yarahindutse
Firdaus: Erega ntawe utahinduka keretse ikigoryi. Iyo ufite icyo ushaka kugeraho, hari ibyo uba usabwa kureka, ibyo usabwa gukora kugirango ubashe kukigeraho. Calema rero aragukunda kandi ashaka kukwiharira. Ahubwo se buriya wowe witeguye kumukunda cyangwa uzamuryarya gusaaaa
Aziz: Sha nkurikije uko mbona agenda ahinduka, ndamutse muryarye naba mbaye bihemu na Allah ntiyazambabarira. Sinazabona ijuru rya Firdaus rwose kandi ndaryifuza
Firdaus: Ibyo uvuga ni byo. Umuntu ugukunda, akemera kureka ibyo yakundaga, ibyamushimishaga ngo akunde akwiharire, ntacyo wamurutisha na kimwe rwose. Komeza umwereke urukundo ndakwizeza ko utazicuza na rimwe
Aziz: Wowe se mubyara wawe bite? Ubu singufashe noneho
Firdaus (aseka): Sha aha ho rwose ntacyo narenzaho. Burya kirya gihe byari bitaracamo, sinari guhamya ngo ni inshuti rero. Singiye kuba nka ba bakobwa baba bagikundana n’umusore, ugasanga yamwirije kuri status ngo umugabo wanjye, kandi ubwo ntanazi murumuna we cyangwa se aho akomoka. Ndabibona ubwo ngahita nseka. Kuba umugabo si ibintu biza umunsi umwe, bitwara igihe. Kandi ubushuti bugenda bukura. Habanza kumenyana, hakaza kwishimirana hagati yanyu, kuganira byimbitse kandi byihariye, hakaza kuba inshuti bisanzwe, hamwe musangira, mutemberana, ibi byose muba muri kwiganaho, nyuma umusore iyo agushimye agusaba ko mwakomeza ubushuti bwimbitse, waba ubona ntacyo bigutwaye na we ukemera. Nyuma rero nibwo mupanga ibyo kuba mwabana, nkuko bishobora no kutazamo, bitewe n’impamvu zinyuranye
Aziz: Ubwo izo nzira zose nazicamo nkabivamo? Reka da
Firdaus: Niho rero usanga ubanye n’umuntu, nyuma y’amezi angahe ugatangira kwicuza cyangwa gushwana no gusaba za gatanya. Ikindi kandi si ngombwa ngo buri ntambwe uyimareho amezi menshi, ubu itumanaho ryaroroshye kumenyana n’umuntu ntibisaba igihe kinini, ariko kumbwira ngo uhuriye n’umuntu mu kazi mu kwa 3, mu kwa 7 mukabana, rwose ntuba umuzi pee. Uba wihuse. Yewe ndabona bari kumpamagara baje kumfata reka ngende. Tuzasubira kandi uzankundire Calema bizanezeza nanjye
Aziz: Sawa mwana turi kumwe
Nahise ngenda njya kureba ba Maurice nsanga bavuye mu modoka. Keila akinkubita amaso yahise ansimbukira angwamo, arampobera numva ndanyuzwe. Yaranyitegereje akanya kanini amfashe mu maboko, arongera arampobera andyamishaho umusaya, numva imbamutima nanjye ntangiye kuzigira
Keila: Kuki koko abantu nkawe baboneka hacye? Wambereye inshuti, umuvandimwe, wantabaye igihe wakabaye untererana, kuba ndi muzima ubu mbikesha urukundo rwawe. Nari narakurakariye mbere ngo wantwariye uwo twakundanaga ariko nasanze naribeshyaga nawe nkurenganya. Gukunda ni amahitamo, ntibyingingwa ntibinategekwa. Urukundo uwo rushaka ni we rusanga kandi isomo nararifashe rwose. Ubu ndakeye ku mutima, namaze gufata Maurice nka musaza wanjye kandi humura niko bizakomeza.
Firdaus: Humura jyewe ndizera kandi umuntu wahinduka n’utahinduka mubona kare. Nta na rimwe nzabuza Maurice kukuvugisha, sinzamubuza kugusura, yewe niyo yagusohokana mugatembera sinzabigiraho ikibazo. Erega uretse kwikunda abantu tugira, ntabwo kuba umusore wawe cyangwa umugabo wawe yasangira n’undi mugore, baganira cyangwa bagirana umubano biba bivuze buri gihe ko bagamije kuryamana cyangwa izindi nkundo. Hariya abagore benshi barahibeshya ugasanga ashobora no gutuma umugabo ava ku kazi ngo kubera yabonye avugana kenshi na nyirabuja. Gusa n’abagabo si shyashya ndabazi benshi usanga hari akazi batakemera ko abagore babo bakora cyangwa se ugasanga bakabakuyeho ngo kubera bahamagarwa kenshi, n’ibindi.
Maurice: Ese jyewe ntunsuhuza nivumbure mbasige cyangwa?
Nahise nibuka ko ntamusuhuje nuko ndamuhobera, tumarana akanya duhoberanye, nuko twinjira mu modoka turagenda. Mu nzira nabasabye ko banyura mu rugo nkabakorera icyayi dore ko hari hanakonje, babyemera batazuyaje, nuko twinjira mu nzu.
Tugeze mu nzu nabakoreye icyayi, tukinywa tuganira, kugeza ubwo basezeye, ndabaherekeza mbageza mu modoka aho iparitse nuko nisubirira mu nzu.
Iyo minsi yagiye ishira neza, urukundo rurushaho kwiyongera, amashuri na yo agenda ajya mbere, akazi kanjye sinigeze nkareka cyangwa ngo ngahindure. Gusa nakomeje gukumbura iwacu, nakibuka ko bamaze no kwicuza nkumva ndushijeho kubakumbura. Gusa byose nari ntegereje igihe nyacyo cyabyo.
TUGARUKE KURI MAURICE
Ubwo Maurice yakomeje gutegereza ko Samson yazamuhamagara, kuko yifuzaga kuzakora ubukwe inzu yaramaze kuzura, kandi bigakorwa Firdaus atabizi bikamutungura.
Ntibyatinze umunsi umwe abona Samson aramuhamagaye
Maurice: Bite se mwana
Samson: Yewe ni neza. Natinze kuguhamagara nari nkiri gushaka ahantu heza watura ukanasagura akarima kandi bitaguhenze cyane
Maurice: Warahabonye se
Samson: Iyo ntahabona simba nguhamagaye. Harahari rwose ahubwo uzaze vuba kwishyura cyangwa bazahagutware. Narahagushimiye rwose ni ahantu hegereye umuhanda ariko nanone hitaruye urusaku, ipoto iri hafi yaho, amazi yo rwose ni nk’ako kanya kuyabona.
Maurice: Nizere ko igiciro kidakabije
Samson: Yewe ntibihenze. Kandi ndizera utazayabura. Gusa harimo ibishyimbo birabije, sinzi niba ushaka guhita wubaka
Maurice: Oya amezi abiri se ntibizaba byeze, narindira bagasarura nta kibazo. Nanjye naba ndi kwisuganya ubwo.
Samson: Gusa hari indi nkuru itari nziza nashakaga kukubwira
Maurice: Inkuru itari nziza gute se kandi?
Samson: Ni inkuru yerekeye iwabo wa Kiragi
Maurice: Kiragi se ni uwuhe?
Samson: Wa mukobwa yewe Firdaus. Mba nibagiwe izina rye.
Maurice: Iwabo se habaye iki kandi?
Ngaho re. Birabe ibyuya ntibibe amaraso

Biracyaza….

FIRDAUS: Agace ka 36

Muganga: Undi niyinjire
Narinjiye nuko ndicara, ariko mfite ubwoba bwinshi
Muganga: Mwaramutse. Umerewe ute se
Firdaus: Muga, maze iminsi mbyuka numva isesemi, namara koza amenyo nkaruka, ibishyimbo sinkibirya, biranampumurira ngahita nduka. Mpora nciragura, ahubwo mba numva nishakira ka shokola gusa
Muganga: Uheruka mu mihango ryari se?
Firdaus: Ukwezi kurarenga
Muganga: Waba warakoze imibonano se idakingiye?
Firdaus: Yego narayikoze
Muganga: Akira kano gacupa, genda uzanemo inkari nkeya, hanyuma dukore ikizami. Ugire vuba urabona mfite abantu benshi kandi ntawundi nakira utaragaruka
Nahise nsohoka ndagenda, nuko muzanira ikizami yantumye
Yafashe agakoresho akozamo, arambika imbere ye
Muganga: Ikizami kirerekana ko utwite, niyo mpamvu uri kubona ibyo bimenyetso byose. Nta bundi burwayi bwihariye ufite. Ngiye kukwandikira ibinini bihabwa abagore batwite, ubutaha uzajya aho basuzumira abagore batwite.
Nahise ndushaho gutengurwa, ndasakuza cyane nti Oyaaaaaaaaaaaaa
Nahise numva umuntu ankomanze, nuko ndebye mbona ni Ines. Burya narotaga
Ines: Ubaye iki Firdaus?
Firdaus: Mbega inzozi mbi wee. Imana imfashe peee
Ines: None se warotaga iki?
Firdaus: Sha sinabiguhisha. Maze ukwezi kurenga ndyamanye na maurice kandi twabikoreye aho. Gusa nkurikije imibare ntabwo nari mu gihe cy’uburumbuke, na we rwose yarabyibariye.
Ines: Nonese kuki mutakoresheje agakingirizo?
Firdaus: Sha byabaye bitunguranye, urumva ko rero atari yakagendanye na njye ntatwo ngira iwanjye.
Ines: none se ntabwo urabona imihango?
Firdaus: oya sindayibona gusa ndumva izaza, ntabwo ndarenza iminsi myinsi. Kandi ejo naripimye mbona sintwite. Gusa inzozi ndose weee.
Ines: urose gute
Firdaus: ndose ndi kwa muganga, ngo mfite ibimenyetso by’umuntu utwite. Muganga apimye asanga irimo, niyo mpamvu nashakuje.
Ines: Rero nubwo udatwite, hari ikintu ukwiye kuzirikana no kwibuka. Maurice murakundana ndabyemera ariko ibuka ko mutarabana. Niba ababana bashobora kujya ahandi bagakora imibonano, uwo mutarabana na we ntibyamubuza kubikora. Ibuka ko nubwo wari wizeye ko utatwita ariko ushobora kwandura izindi ndwara nk’imitezi, virusi ya SIDA, hepatite n’izindi zandurira mu mibonano mpuzabitsina. Jye rero inama naguha, nunongera kubikora, nubwo ntabigushishikariza, uzibuke mukoreshe agakingirizo kuko kakurinda byinshi kandi usigara igitima kitadiha. Erega inzozi warose ni uko imihango isa n’iyatinze. Nubwo uvuga ngo nta bwoba ufite ariko ntibwabura bucye. Ubundi se wizeye ute ko ukwezi kwawe kudashobora no guhinduka? Na byo jya ubitekerezaho, wibaze utwise uko byakugendekera. Sibyo?
Firdaus: Sha ni byo pee. Ese ubundi ubu ntibwakeye ngo tubyuke dukore icyayi njye ku ishuri nawe ujye ku kazi
Ines: Ndabona bikiri saa kumi maze. Reka twongere dusinzireho
Firdaus: Reka njye muri salon mbe ndeba film ntongera gusinzira nkarota. Nifitiye ubwoba
Hashize ukwezi ndyamanye na Maurice. Kuva twaryamana, urukundo ankunda rwarushijeho kwiyongera nanjye kandi numva mukunze cyane. Buri minsi byibuze itatu aransura, kandi buri munsi aza ku ishuri kuncyura, cyangwa ku kazi. Kuva twabikora ntarongera kubinsaba, ntajya anabikomozaho. Sinzi niba naramubihiye cyangwa se ari ukudashaka kubikora kenshi. Gusa urukundo rurahari ku buryo bugaragarira buri wese.
Nagiye muri salon kuba nirebera filimi ariko nkomeza kwibaza impamvu imihango yanjye yatinze kuza, kuko nkurikije igihe yakabaye yaraje, hamaze kurengaho ibyumweru bitatu.
Nahise nyarukira ku rubuga nkunda gusomaho inkuru zerekeye ubuzima gushaka icyaba gishobora gutera kubura imihango kandi ntatwite nuko mpasoma ibi bikurikira:

1. Stress

Stress niyo iza ku isonga mu mpamvu zituma imihango itinda kuza. Ituma habaho kutaringanira kw’imisemburo kandi stress ifata agace k’ubwonko kitwa hypothalamus gashinzwe kuringaniza imisemburo.
Ibitera stress ni byinshi, ibibazo bwite, mu muryango, ku kazi, ubukungu, …

2. Kunanuka

Niba usanzwe wifitiye igara rito, ntacyo bitwaye. Ariko kunanuka byaba bitewe n’uburwayi, ubushake se cyangwa indi mpamvu ku buryo ugira BMI iri munsi ya 10% ugereranyije n’iyo wakagize (kuko intoya yakabaye 18.5, ubwo kuba wagira BMI iri munsi ya 16.65) nabyo biri mu bituma umubiri uhagarika gukora imwe mu misemburo kuko uhita ujya mu gukora ibindi umubiri ukeneye kugirango ugarure akagufu. Aha binagendana no kurwara ukaremba cyane, impinduka mu mirire, ikirere, kwimuka…

3. Umubyibuho ukabije


Aha naho kimwe no kunanuka, umubyibuho ukabije nawo (kugira BMI irenze 30 cyane cyane) bishobora gutera impinduka mu mikorere y’imisemburo bikaba byatera kubura imihango bya hato na hato

4. PCOS


Polycystic ovary syndrome ni uburwayi butuma umubiri w’umugore ukora imisemburo gabo myinshi kurenza ikenewe. Ibi bituma mu mirerantanga hazamo cysts twagereranya n’ibibyimba nuko bigatuma imihango igenda nabi cyangwa igahagarara.

5. Imiti yo kuboneza urubyaro


Gutangira cyangwa guhagarika imiti iboneza urubyaro irimo imisemburo (ibinini, inshinge, agapira ko mu kuboko) bishobora gutuma imihango ihagarara kuko iyi miti irimo ituma utagira igihe cy’uburumbuke. Cyane cyane urushinge nirwo rukunze gutera kubura imihango kimwe n’agapira ko mu kuboko, uretse ko n’ikinini kirinda gusama akokanya (emergency pill) gishobora gutinza imihango

6. Indwara karande


Zimwe mu ndwara za karande nka diyabete zishobora gutera impinduka mu misemburo yawe. Guhinduka kw’isukari mu maraso bishobora gutera impinduka mu misemburo.

7. Ikibazo kuri thyroid


Iyi ni imvubura iba mu ijosi ikaba ishinzwe gukora imisemburo ituma habaho kuringanira kw’imikorere yo mu mubiri imbere (ubushyuhe, imisemburo yindi, …) iyo rero iyi mvubura idakora neza bishobora kugira ingaruka ku mikorere y’imisemburo bityo bikaba byatera ikibazo cyo kubura imihango

8. Kuba uri hafi gucura


Kimwe mu bimenyetso by’uko uri hafi gucura ni uko imihango itangira kugenda iza nabi. Niba biri kukubaho uri mu myaka iri hajuru ya 40 bishobora kuba ikimenyetso cyuko uri hafi gucura.
Nabisomye byose mpita mbona ko kuba jyewe imihango itaraza ari uko mfite stress. Nyine kuba mfite ubwoba ko naba naratwite, ubu noneho Ines na we arampuhuye ati indwara, ahubwo noneho ubaza izagendera rimwe. Gusa naratuje, nirebera filimi buracya dukora icyayi, nuko nitegura kujya ku ishuri, Ines yari yansuye ararara. Ni we wantwaye angeza ku ishuri abona gukomeza agana ku kazi.
Ubwo amasaha yo kuva ku ishuri yageraga, nabonye nimero ya Keila impamagaye, nuko nditaba. Gusa natunguwe no kumva atari ijwi rye ahubwo ari ijwi rya Maurice
Umutima wahise usimbuka, nibaza niba hari ikibazo Keila agize cyangwa se Maurice basubiranye
None se wa mugani ibi ni ibiki?

Biracyaza…..

FIRDAUS: Agace ka 35

Nagumye akanaya gato mu cyumba ndi kurira, kugeza ubwo Maurice akomanze ku rugi. Niyumvisemo ubwoba ntazi aho buturutse, gusa ndihanagura, ndamukingurira.
Maurice: Ninjire mu cyumba cyangwa urasohoka unsange muri salon
Firdaus: Oya nta kibazo injira ntaho uhejwe hano kandi ntacyo ngukinga
Maurice: Ngaho kenyera agatenge cyangwa wambare ipantalo, ntongera kugwa mu bishuko
Firdaus: Urakoze. Gusa umbabarire sinigeze mbyitaho kandi sinari ngambiriye kukugusha mu mutego
Maurice: Nta kibazo pee. Ahubwo se kuki wahise ugenda urira byatewe n’iki? Nari nkubangamiye?
Firdaus: Cheri. Nari ntsinzwe habuze gato, ahubwo Imana ishimwe kuba nahise nibuka nkakwiyaka. Amakuru yanjye yose urayazi, nayo utazi uyambaze. Papa na mama bantwise batabishaka, bituma nkurira mu rwango. Ubuzima bwanjye bwose mu myaka 17 nta munsi n’umwe nigeze nishimamo. Natangiye kwishima aho ngereye ino, gusa sinakibagirwa ibyamabayeho byose. Mu kuri ndabizi ndanabibona urankunda. Gusa sindiyumvamo urukund rwuzuye, mba numva ntazi gukunda, sinzi no gutetesha kuko sinabibonye kandi umuntu yigana ibyo yabonanye ababyeyi be. Ikindi nkurikije uko ukwezi kwanjye kureshya ndi mu gihe cy’uburumbuke, ibaze rero iyo ntakwiyaka, ubu nari kuba namaze gutwara inda. Siniteguye kubyara ubu. Ikindi sinizeye ko uwo mwana yazagira ibyishimo, sinzi ko nabimuha. Abantu se ko bahinduka, ubu ntwaye inda, ukanyanga, uwo mwana ntiyazakura nk’uko nakuze? Nubwo wenda jyewe namurera neza ariko ntiyabona uburere n’urukundo akwiriye. Ngiyo impamvu nahise nirukira hano mu cyumba, nkikingirana nkarira. Nari mpuje ahahise n’ibyari bigiye kumbaho. Umbabarire rwose
Maurice yahise amfata ku rutugu, ambwira andeba mu maso
Maurice: Firdaus mukunzi wanjye. Amakuru yawe yose ndayazi kandi yatumye ndushaho kugukunda. Benshi iyo bahuye n’ibibazo nk’ibyo wagize bahita biyahura mu biyobyabwenge, kwiyandarika, guta ishuri n’ibindi bibi byinshi. Ariko wowe, byose wabirenzeho ukomeza ubuzima kandi ubu uri guhirimbana ushaka ubuzima bwawe bw’ahazaza. Ikindi sinifuza kuba nagutera inda, kuko nanjye sinshaka ko umwana wanjye yakura tutari kumwe. Nifuza ko ubanza ugasoza amasomo yawe, ubundi tugategura ibyo kubana kandi nifuza ko bwazabera mu Rwanda kuko sinshaka ko uzatira ababyeyi kandi ubafite bagihari. Kuryamana si byo nshyize imbere kuko si byo byaduhuje, gusa umubiri wari wandushije ingufu, ariko ndagushimira ko wabaye intwari naho twari dukoze ikosa rikomeye. Ahubwo se ko ibi hari igihe nubundi bizongera bikatubaho, tuzabyitwaramo gute?
Firdaus: Ku bwanjye sinzi icyo twakora kuko nkubwije ukuri ndacyari isugi. Ntabwo ndaryamana n’umugabo n’umwe. Ariko nanone sinahamya ngo tuzarinda tubana bitarabaho. Ariko nanone hari byinshi twakora tukishima tutaryamanye nkuko twanaryamana tukirinda inda itateguwe. Byose ni twe dufatanyije tuzabifataho umwanzuro.
Maurice: Reka tubiganireho tubirangize. Ese ntabwo wafata imiti ikubuza gusama, tukajya tubikora ntacyo twikanga? Cyangwa se ukajya ufata ikinini kibuza gusama, igihe twabikoze?
Firdaus: None se kuki tutakoresha agakingirizo cheri? Ko ariko wabona ahantu hose, igihe cyose? Ubu koko washimishwa nuko ntangira kuboneza urubyaro ngana gutya? Uretse ko jyewe nzi no kubara ukwezi kwanjye, keretse bibaye impanuka
Maurice: Sha ubu icyo kwizera kubara ntiwakinshuka rwose. Sinifuza kuba nazicuza nguteye inda bitunguranye. Tuzihangana, niducikwa tuzakoresha agakingirizo. Nicyo jyewe nahitamo. Ndagukunda sinifuza kuba nakwicira amasomo ugomba kwiga ukarangiza.
Twakomeje kuganira, gusa nkumva nishimiye kuba ndi kumwe na Maurice. Tukiri kuganira, nibwo yaje kumbaza niba naba nzi neza koko ibyerekeye ukwezi k’umugore, nanjye mpita nibuka ko hari ahantu nigeze gusoma basobanuraga neza ibyo kubara ukwezi.
Narabimusomeye, dore uko byavugaga
Ubusanzwe intangangore iyo ikuze irarekurwa ikava mu murerantanga ikajya mu miyoborantanga ariho itegerereza intangangabo. Iyo hashize amasaha 24 nta ntangangabo ibonetse ngo habeho gusama, ya ntangangore irapfa, hagashira iminsi igasohokana n’amaraso aribyo byitwa kujya mu mihango. Byumvikane ko umunsi nyirizina w’uburumbuke ari igihe hasigaye iminsi 14 ngo ubone imihango. Aha niho benshi bibeshyera bakumva ko ubona uburumbuke ku munsi wa 14, kandi ahubwo ubugira hasigaye iminsi 14 ngo imihango ize


Ku bafite ukwezi kudahindagurika kuwumenya biroroshye, ku bafite ukwezi guhinduka nabo hari uburyo bwabo bwo kubibara nkuko turi bubibone.


Twibutse nanone ko intangangabo iyo zigeze mu mugore zimara iminsi 5 zikiri nzima zitegereje intangangore.


Dusubiye inyuma rero uteranyije ni iminsi 6 (1 intangangore imara ikiri nzima na 5 intangangabo zimara), ukongeraho undi munsi w’icyizere cyuzuye ikaba iminsi 7. Impamvu uyu munsi wongerwaho nuko hari abagore bagira intanga zimara iminsi 2 zikiri nzima.

Dufashe urugero ku mugore ufite ukwezi kudahinduka kw’iminsi 25, umunsi we w’uburumbuke ni umunsi wa 25-14=11 ukaba umunsi wa 11 ubara uhereye ku munsi wabonyeho imihango.


Kuko intangangabo zimara iminsi 5 ubwo turakuramo 4 (uwa 5 tuwuhuze n’umunsi igi ryarekuriweho) tubone 11-4=7


Bivuze ko igihe cye cy’uburumbuke gihera ku munsi wa 7 uhereye igihe aboneye imihango


Noneho turongeraho 3 kugirango turebe igihe uburumbuke buzarangirira 11+3=14


Uyu mugore uburumbuke bwe buzahera ku munsi wa 7 bugeze kuwa 14.


Ku mugore cg umukobwa ufite ukwezi guhindagurika rero we ntibiba iminsi 7 gusa ahubwo birahinduka niyo mpamvu buri wese agira igihe cy’uburumbuke yihariye.

Uko bikorwa

Iyo ubonye imihango iyo tariki urayandika. Ubutaha yaza ukongera ukandika iyo tariki. Ukabikora byibuze amezi 6 akurikirana.

Ugenda ubara iminsi iri hagati y’ukwezi n’ukundi, gusa mu kubara ugahera ku itariki waboneyeho imihango ukageza ku itariki ibanziriza imihango ikurikira


Urugero niba imihango ije kuri 17/07 ikazongera kuza ku itariki 15/08, uzabara uhereye kuri 17/07 ugeze kuri 14/08.


Ibyo iyo ubirangije, ufata gusa iminsi yabaye myinshi n’iminsi yabaye mikeya.


Niba wabonye wenda 29, 31, 28, 30, 27 ubwo uzafata gusa 27 na 31.


Noneho kuri ya minsi myinshi uzakuramo 11 naho ku micyeya ukuremo 18.

Ku rugero rwacu, 31-11=20 naho 27-18=9


Ni ukuvugako uyu muntu iminsi ye y’uburumbuke ihera ku munsi wa 9 ahereye ku munsi aboneyeho imihango, kugeza ku munsi wa 20.


Agiye mu mihango tariki 17/08 iminsi y’uburumbuke yazahera tariki 25/08 ikageza tariki 05/09.


Akoze imibonano hagati muri ayo matariki ashobora gusama.

Namaze kubimusomera, nuko afata ikaramu yari aho ku meza, ambaza igihe mperukira mu mihango, anambaza uko ukwezi kwanjye kureshya dore ko yari abizi ko kudahinduka, nk’uko nari namubwiye.
Nk’umuhanga mu mibare, yahise abara
Maurice: Ese kuki wambeshye cherie?
Firdaus: Nkubeshya iki se kandi cheri?
Maurice: Ko mbona ahubwo uri hafi kujya mu mihango? Uburumbuke wavugaga ntabwo urimo pee
Firdaus: Cheri mbabarira, numvaga ntafite uko nagusobanurira kundi
Maurice: Ngiye kuguca amande rero wambeshye
Firdaus: nimba nyafite ndayaguha kandi mbabarira
Yahise anyiyegereza atangira kunsoma, mpita nibwira amande ashaka kunca ayo ari yo. Nibajije niba amagambo amaze kumbwira yari akomeje cyangwa yivugiraga nuko mwiyaka buhoro
Firdaus: None se cheri, ufite agakingirizo?
Ubu se Maurice aragafite koko cyangwa yizeye imibare?

Biracyaza….

FIRDAUS: Agace ka 34



Ubwo Samson yamugeragaho, yahise amubwira aho ashaka kujya nuko bahita bagana yo, dore ko hatari kure cyane. Nuko bagezeyo, asaba Samson ko aba aretse gato, bakabanza bakaganira mbere yuko agenda.
Yahise yinjira abaza uwo asanze muri iryo duka niba yabona flash ndetse anamubaza niba yabona umukurira amajwi kuri terefoni akayabika kuri flash atunganyije neza, undi amubwira yuko na we azi kubikora, nuko bumvikana igiciro, abimukorera vuba, nuko undi ahita abibika, arasohoka.
Yasanze Samson amutegerereje hanze, nuko amubwira kumwereka aho baganirira hari akabari keza ariko kadahenda
Baragiye baricara, batumiza icyo kunywa, nuko batangira kuganira
Maurice: None se mwana, ko cya gihe wanze kungeza muri ruriya rugo?

Samson: Ahubwo se mupfana iki? Bariya bantu ndabatinya sana

Maurice: ntacyo dupfana jyewe ahubwo nari naje gushaka amakuru yerekeye wa mukobwa nakweretse mu ifoto. Ngo yitwa Kiragi ariko?

Samson: Yego sha. Uriya Kiragi yarambabazaga nkabura icyo mbikoraho. Yari umwana witonda, ariko mu myaka micye atangiye ishuri aba abaye ikiragi. Gusa yarumvaga ahubwo kuvuga wapi

Maurice: None se wamenya byaraterwaga n’iki?

Samson: Buriya nuko wenda utamuzi neza, iwabo bahoraga bamukubita, bakamutwika, mbese ibye birababaje. Byatumye abantu bose batinya kuhajya, ngo batavaho nabo bagirirwa nabi

Maurice: None se ubusanzwe ni bo bamubyaye cyangwa baramutoraguye?

Samson: rero sinzi niba ari ukuri, ariko bavuga ko uriya mugabo ngo iwabo ari abakire cyane. Rero ntibashakaga ko abana na mama Firdaus. Noneho mama we na we ngo yari afite mwene wabo wabaga mu Bufaransa wari waramushakiyeyo umuntu bazabana. Ubwo rero ngo bo bikundaniraga byo kuryoshya gusa, bazi ko igihe kizagera bagatandukana. Nuko kwa kuryoshya hazamo gutera inda, kandi mu muco wabo nyine uteye umuntu inda ugomba kumutwara.
Urumva rero bahise babana, batabishaka ahubwo ari ukubura uko bagira. Umugabo rero iwabo ngo bahise bamuca mu muryango, umugore na we amahirwe yo gushaka umuzungu aba abuze atyo, byose bitewe nuko hajemo inda ya Kiragi, nako Firdaus. Nguko uko umwana yavutse batamushaka, akura batamushaka, dore ko kuva yanavuka ntawundi mwana babyaye bakavuga ko buriya ari umuteramwaku.

Maurice: Yoo. Mbega umukobwa wagowe akiri muto. Ariko yararenganaga rwose. Kuko si we wababwiye ngo bakore imibonano batikingiye. Ubundi se ko bumvaga badashobora kubana kuki bakoze imibonano batikingiye cyangwa ngo nibayikora bafate imiti ibuza gusama?

Samson: Nawe rwose urasetsa. Urumva se ubundi wowe gahunda Imana yapanze wayibuza kubaho. Buriya wari umupango wayo tu. Ese ubundi ko nisonzeye turanywa tutarya? Nakubonye uri umuboss uragura agakwavu cyangwa inkoko tu. Hano ntibahenda humura

Maurice: Hamagara wa museriveri aze tumuhe commande nanjye ndumva nshonje
Umuseriveri yaraje, bamuha commande nuko asubiyeyo bikomereza ikiganiro.
Samson: None se boss, ubundi uriya mukobwa umuzi ryari? Ese ubundi aracyari muzima ko numva ngo ubanza yarapfuye

Maurice: Ntabwo nabiguhisha rwose kandi ubu twamaze kuba inshuti. Naje nturutse muri Kenya, uriya mukobwa niho ari, ni inshuti yanjye cyane. Rero yambwiye amakuru ye, numva sinizeye neza ukuri kwayo, mpitamo kuzaza kuyishakira nkamenya neza ukuri. Rero iwabo ubu ngubu bamaze kumpa amakuru nyayo, nubwo batabizi ibyo nashakaga kugeraho. Nawe kandi buriya ayo wampaye ni ingenzi, byatumye ndushaho kumunenya neza

Samson: Eeeeeh. Waturutse Kenya? None se ko uvuga ikinyarwanda neza?

Maurice: Erega buriya mwana kuba ahantu ntibivuga buri gihe ko uri kavukire waho. Jyewe inkomoko yanjye ni mu Rwanda, nubwo nakuriye muri Kenya. Ikinyarwanda rero ndakizi, nubwo ntakundaga kukivuga. Uzi ukuntu uriya mukobwa namushutse ngo azanyigisha ikinyarwanda, akagirango nta na gacye nzi

Samson: urarenze wowe. None se harimo gahunda cyangwa ni amaturu gusa

Maurice: Ni gahunda. Ntegereje ko arangiza kwiga ngahita mbisoza ku mugaragaro. Ahubwo icyo nagushakiraga, nashakaga ko usigara unshakira ikibanza ahantu hatari mu mugi ariko hari amazi n’umuriro. Nitumara kubana tuzaza gutura mu Rwanda ni yo gahunda numva mfite

Samson: ubwo se kuki udashaka mu mugi musaza? Itawuni niyo ya danger. Nka za Kigali cyangwa Gisenyi numva ngo ni sawa ku bakire

Maurice: Oya jyewe ibikorwa nshaka gukora biransaba mu cyaro kuko nshaka kuzakora ubuhinzi n’ubworozi bya kijyambere. Sinabikorera mu mugi rero. Ufite nimero yanjye numara kubibona wowe uzambwira ngaruke nishyure. Ubu nshaka gusubira Kenya kuko naje iwacu batazi aho ngiye, batazagirango narapfuye cyangwa baranshimuse dore ko iyi minsi nta mikino

Samson: nta kibazo rwose boss. Wowe ahubwo ninahabura nzaguha ahanjye tu. Ariko uzi ukuntu nakwikundiye. Ntiwiyemera, kandi uri boss nabibonye.
Bakiganira commande yabo yaraje, nuko bararya, banaganira, nuko amasaha ageze Maurice afata urugendo asubira gutega indege asubira iwabo muri Kenya.
TUGARUKE MURI KENYA
Nari niyicariye ndi gusoma ikinyamakuru, nuko mbona nimero ya Maurice irampamagaye
Maurice: cherie ndagukumbuye biteye ubwoba. Uri hehe se

Firdaus: Nibereye mu rugo ndi gusoma ikinyamakuru.

Maurice: ko utagiye ku ishuri se?

Firdaus: Sha ndumva ntameze neza. Gusa nta nubwo nubundi bari kwiga neza iyi minsi, nzajyayo mu cyumweru gitaha ndangije na conge ku kazi

Maurice: Ko utari kumbaza aho ndi se

Firdaus: ahubwo nyine ndatunguwe. Ejo wari mu Rwanda, none uri muri Kenya? Ugeze hehe se utaha

Maurice: Kingura idirishya urebe hasi
Narakinguye ndebye mbona imodoka ya Maurice iparitse hasi. Ntazuyaje nahise nsohoka niruka cyane, sinigeze nanibuka ko nambaye agakanzu kagufi ndarana. Namugezeho mpita musimbukira ndamuhobera, tugumana umwanya namwumiyeho, amarira y’ibyishimo ari kuntemba ku matama.
Maurice: Cherie ngufitiye amakuru menshi tujye mu nzu nkuganirize. Ndanashonje nibwo nkiva mu ndege mu kanya, urantekera

Firdaus: Nta kibazo rwose ni karibu
Twagiye mu nzu, tugezemo muha karibu aricara, nanjye mpita ncana gaz mukorera ikawa irimo amata, dore ko ari kimwe mu binyobwa nkunda kandi igarura imbaraga mu mubiri.
Maze kumuha ikawa namwicaye iruhande muryama ku rutugu. Ibyo kuba ibibero byose byarabonekaga sinigeze mbyitaho, numvaga kuba ndi kumwe na we bihagije.
Ubwo twaganiraga yakoze mu mufuka, akuramo flash arampereza
Maurice: ndacyeka amafoto yo warayabonye, nari naragiye iwanyu ku ivuko. Ibisigaye biri kuri iyi flash, nushaka ubyumve ubu cyangwa uze kubyumva nagiye

Firdaus: Oya amatsiko ni yose ahubwo reka nzane machine mbyumve. Ariko se mbanze nkubaze, burya uzi ikinyarwanda? Waganiriye na bo gute?

Maurice: Yego ndakizi, burya kukubwira ngo uzakinyigishe bwari uburyo bwo gutereta, naho buriya ngira inkomoko mu Rwanda. Nako tuzabiganiraho.
Narayizanye ncomekaho flash. Uko numvaga ikiganiro hagati ya papa na mama, agahinda karushijeho kunyica, numva intimba ku mutima, gusa nanone ndushaho kumva mbakumbuye. Narihanaguye nuko mbaza Maurice uko ayo majwi yayabonye
Maurice: Nagiye niteguye bihagije kandi nkimara kubona mama wawe, nahise mbona ko umugambi ndi buwugereho. Nari nitwaje agafata amajwi kakayohereza muri terefoni yanjye, ubwo rero navuye mu cyumba narayemo nsigamo ifoto yawe, nanandikaho inyuma. Ndigendera, nitegura kuza kumva ko bari bujye aho naraye. Ntibyatinze rero nyuma y’iminota nka 20 mpavuye nahise ntangira kumva ikiganiro, nuko maze kukibona cyose njya muri studio bagishyira kuri flash. Iwanyu bagaragaza kwihana no kwicuza, kandi ndagusaba kubababarira, ikiboneka cyo barihannye.
Nahise mpaguruka kubika machine, mvuyeyo nsanga maurice ahagaze, ndamureba mpita mugwa mu gituza. Ntawundi mugabo nka we nabona, aritanga kandi azi kunshakira ibyiza.
Uko nakamuguyemo, yankoze mu mugongo yumva inkovu nuko anyongorera ko inkovu mbi ari iyo ku mutima, naho iyo ku mubiri ntacyo ivuze. Yaranyitegereje, nuko arongera arampobera, ari na ko ankorakora mu mugongo. Ubushagarira bwatangiye kuzamuka, na we abibonye ahita anterura mu maboko, arantwara andambika mu ntebe. Agakanzu nari nambaye kahise kazamuka, ku buryo ikariso nambaye yatangiye kugaragara, maze anyubarara hejuru atangira kunsoma. Uko yansomaga niko yakomezaga kunkorakora, nuko numva agiye kunkora ku ikariso. Nahise nshidukira hejuru ndamwiyaka, nsimbukira mu cyumba negekaho urugi ntangira kurira
Ese yarijijwe n’iki? Agahinda cyangwa ibyishimo?

Biracyaza…

FIRDAUS: Agace ka 33

DUSUBIRE MURI KENYA
Ubwo nari niyicariye mu rugo, irungu ryanyishe nabuze icyo nkora n’aho ngana, nibwo nagiye kubona mbona nimero ntazi, ariko byerekana ko iri mu Rwanda impamagaye. Nibajije umuntu uri mu Rwanda waba afite nimero yanjye, biranyobera. Gusa naritabye, ncyumva ijwi nkubitwa n’inkuba
Firdaus: Cheri amakuru?
Maurice: Amakuru ni meza. Umeze neza se?
Firdaus: Ubu mpise mera neza ariko ndibaza icyo uri gukora mu Rwanda. Ni amahoro se
Maurice: Ese wahise umenya ko ndi mu Rwanda?
Firdaus: Nawe ubanza bwarivanze. Ntiwari uzi ko iyo uhamagaye se hanze y’igihugu hazaho code y’igihugu urimo? Cyangwa urumva umwaka umwe koko naba nibagiwe nimero zo mu Rwanda uko zimeze?
Maurice: Eeeeh. Rero nguhamagaye ngirango udakomeza guhangayika. Ndi muzima, ibyanjyanye nzabikubwira ngarutse. Icyakora uze kureba kuri whatsapp amafoto nakoherereje. Turasubira mu kanya.
Yahise akupa nanjye nihutira gufungura whatsapp ngo ndebe. Ngifungura natungukiye ku mafoto neza neza y’icyumba nararagamo ubwo nari nkiri iwacu. Maurice yageze iwacu? Ubu se disi yari yagiye gukora iki?
Numvise amatsiko anyishe, ngerageje guhamagara biranga, mwandikiye nsanga yavuye ku murongo. Mama weeee. Maurice rwose nawe arushijeho kuncanga. Maurice iwacu? Ubu se yakoragayo iki?
Nakomeje kubyibazaho kugeza ubwo nakiraga terefoni ya Calema. Yambajije niba ndi mu rugo ngo ansure ndamwemerera nuko mu kanya gato aba arahageze
Calema: None se kuki utakiza kwiga?
Firdaus: Sha nari ndwaje umushuti wanjye wari urwaye. Rero bamusezereye ejobundi, numva sindaruhuka neza. Mwize byinshi se
Calema: Sha urebye ni nkaho ntacyo wahombye. Uretse mwarimu umwe waje na we yaduhaye imyitozo arigendera. Wari umeze neza ariko
Firdaus: yewe ndaho meze neza. Bite se bya cheri wawe Aziz?
Calema: Sha ibyo wambwiye narabikoze, nsubiza ubutumwa bwe iyo anyandikiye, niyo aje ku ishuri aramvugisha bisanzwe, ajya anaza tukicarana ariko nyine mba numva ntatuje
Firdaus: udatuje gute se? Kubera iki
Calema: Ndumva ndi gukunda Aziz kurenza mbere ariko sinzi icyo nakora ngo umutima we nywutsindire burundu, abone ko ntari Calema wa kera.
Firdaus: Birashoboka ariko burya. Hari ahantu mperutse gusoma inama bagira abakobwa nkawe, reka ndebe niba ndi bubibone mbigusomere
Calema: icyo ngukundira uhorana ibisubizo hafi wowe. Aho hantu se bavugaga ibiki
Firdaus: Ndabibonye reka ngusomere nawe wiyumvire
Kugirango utsindire umutima w’umusore, usabwa kwita kuri ibi bikurikira

1. Va mu mikino

Niba wigira ntacyo bimbwiye iyo muri kumwe nyamara yamara umunsi atakuvugishije ukabura amahoro, uri mu mikino. Ibuka ko atareba mu bwonko bwawe ngo amenye ko umukunda koko. Niba umukunda bigaragaze, abibone.

2. Mesa kamwe


Dukoresha imbuga nkoranyambaga kenshi mu kuganira no gusabana. Nyamara ushobora kugwa mu mutego wo kutamenya guha agaciro n’umwanya w’ibanze umusore wihebeye. Niba wumva ushaka gufata umwe rukumbi bigaragaze. Si ngombwa ngo wirirwe ubibwira cyangwa ubyandika aho ari ho hose, ariko burya uwakunze kamwe arigaragaza haba mu biganiro, mu ngiro no mu myitwarire.

 

3. Menya ibyo wemerewe n’ibyo utemerewe

Kuba wakifotora wambaye bikini amabuno agaragara inda iri hanze, ni uburenganzira bwawe. Ariko se niba wiyemeje guhitamo umwe rukumbi, wumva kwiyereka isi yose bikunguye iki niba udakora akazi kagusaba ayo mafoto cyangwa utari kwamamaza? Bitekerezeho unamenye niba abishima cyangwa abigaya

4. Iyubahe


Nutiyubaha ntawundi uzakubaha. Ibi byo ntawe ubishidikanyaho. Buri musore yishimira umukobwa wihesha agaciro, wiyubaha kandi utiyandarika ngo yitware nk’icyomanzi. Niba udahahira mu isoko runaka nta mpamvu yo kuryinjiramo kandi niba utari umujiji ntukajye mu bajiji

Ese wumva ujya mu kabyiniro ukabyinana n’umuhisi n’umugenzi ari byo bizatuma ubona umusore ugukwiye cyangwa ahubwo uzabona ugushakaho umubiri gusa? Simvuze ngo reka kwidagadura ariko menya umupaka ntarengwa

5. Mumenye


Ntiwakundana n’umuntu utazi, aha rwose waba wabyishe.

Ni byiza ko umenya neza uwo mukundana, ibyo akora, ibyo akunda, ibyo yanga n’ibindi binyuranye bimwerekeye. Uko kumumenya bizaguha ishusho nyayo yo kumenya niba koko mwashobokana cyangwa se mutahuza. Ikosa benshi bakora ni ukwihutira ishyingirwa abataramarana agahe baziranye ugasanga uko wamubonaga siko ari nuko gatanya ikaba iraje.

6. Muganirize


Kuganira ni inzira y’ibanze mu kongera imibanire n’ubusabane mu bakundana. Muhe umwanya haba imbonankubone, haba ku mbuga nkoranyambaga, umenye uko yaramutse, amerewe, niba ari ku kazi cyangwa mu rugo, mbese umuhe umwanya wawe.

7. Wimuhisha ahahise


Buri wese agira ahahise heza cyangwa habi. Nib akeneye kumenya uko wabayeho mu hahise kandi hakaba ari habi, mubwize ukuri kandi umubwire umwereka ko aho witwaye nabi wifuza kuhakosora mufatanyije, aho wababaye akaba ariwe waguhoza.mbese utume akugirira impuhwe kandi yumva ko koko mukwiranye kuko umutima wawe wawumuhaye. Aho kugirango akubwirwe n’abandi, ni byiza ko wowe bwite umwibwira

8. Wipiganwa na we


None se niba anyoye inzoga ni ngombwa nawe uyinywe? Niba asohotse nawe usohoke? Oya. Ba wowe ureke nawe abe we, niho muzanamenyera guhana agaciro mu byo mukunda.

9. Mwubahe wubahe igihe cye


Niba mwahanye gahunda wiyica ku munota wa nyuma kandi udafite impamvu ifatika. Niba udafite icyo kumubwira gifatika wimutesha ibyo arimo ngo umubwire ko umushaka. Kubaha umuntu ukubaha umwanya we bituma nawe abasha kukubaha akanubaha igihe cyawe

10. Wimuhora ibyo atakoze


Ushobora kuba warababajwe na benshi mbere ye. Rero siwe ukwiye kuba inzirakarengane ku makosa y’abandi we atagizemo uruhare.

Niba uwo mwatandukanye waramuhoye kuguca inyuma wihita ubitura kuri uwo ngo niba umubonanye n’umukobwa cyangwa usanze hari uwo bandikiranye ubigire intambara umucyurire ibyo atakoze

11. Niba musohokanye muhe ibyishimo

Kuba yafashe cyangwa wafashe akanya ko gusohokana na we ngo musangire mwishimane, tuma ako kanya kaba agahora kibukwa iteka kandi mwese muryoherwe n’ibyo bihe. Gerageza utume uwo munsi utazibagirana. Amagambo ukoresha, inseko, imyitwarire, bitume aryoherwa kandi yishima

 

12.  Ba umunyampuhwe


Kuba umunyampuhwe bivuze kugaragaza umutima w’ubugwaneza, kugaragaza urukundo no kumwitaho ukamenya icyamubabaje, niba yarwaye ukamuba hafi, mbese ku buryo kuba uhari kuri we abibonamo igisubizo cya byose. Numusura ntutinye kumutekera, kumukorera isuku, kumufurira…

13. Rema urwibutso hagati yanyu aho kugarura ibyahise byawe


Nibyo koko hari byinshi wakibuka ndetse bibabaje hagati yawe n’abo watandukanye na bo ariko se kubigarura bimaze iki hagati yanyu? Ahubwo nicyo gihe ngo mureme ibindi byiza hagati yanyu muzajya muratira abandi bose n’abazabakomokaho

 

14. Igirire icyizere


Wikumva ko udashobora kumurutira abandi baba abo batandukanye cyangwa se abandi bakobwa bahari. Ahubwo iyumvemo ko ubaruta kandi ufite icyo ubarusha azagukurikiraho. Imyitwarire yawe niyo izatuma mugumana cyangwa mugatandukana

15. Ba wowe ubwawe


Wigira uwo wigana cyangwa ngo ugire imyitwarire idasanzwe kugirango umwemeze cyangwa umwigarurire. Oya. Ba wowe, ukomeze kuba uko wari uri ahubwo ibyo uzi bibi byatuma atakwemera ari byo ureka. Naho kwiyambika ukundi, kwisiga ukundi, byo ubwabyo ta rukundo rudasanzwe byazana nubwo bishobora kugendana n’ibigezweho
Narangije kubisoma mbona mu maso ya Calema hari kuzengamo amarira.
Calema: Sha uwanyereka uwanditse izo nama. Ni zo pee. Ni byinshi nibutse nakoze ahahise byatumye abasore bose babona ko ndi uwo gusambana na bo gusa. Nta wigeze ansaba gusohokana na we ngo nange, apfa kuba yarabaga afite ayo kunywera. Najyaga njya mu kabari ngataha bucyeye, ubwo uwo twasohokanye yansaba kumuherekeza nkabura imbaraga zihakana. Na Aziz buriya twatangiye kuganira bwa mbere duhuriye mu kabari, sinari nzi ko tunigana. Nabimenye bucyeye nje kwiga nkamubona mu ishuri. Urumva yari amaze kumvumbura sinari mfite uko mucika. Aho amariye kuryamana na njye atangira kunsuzugura no kunyima agaciro, kumbe ni uko ari ko namwiyeretse nyine. Gusa urakoze. Izi nama ngiye kuzubahiriza kandi ndizera ko nzabishobora. Hagati aho se wowe bite?
Firdaus: Sha jyewe bimeze neza, Maurice rwose yamaze gufata umwanzuro, nkurikije uko mbibona kandi ngerageza kumubera inshuti nyayo kandi nziza. None se ko ngiye guteka, ntugihari nteke byinshi dusangire?
Calema: Ahubwo uteke byinshi cyaneee. Nshonje bidasanzwe
Twahise tujya mu gikoni, dukomeza guteka tuganira
TUGARUKE MU RWANDA
Umusaza yaraje nuko agikubita amaso ifoto ariyamirira
Papa Firdaus: Uyu ni Firdaus wanjye cyangwa ndarota? Niko iyi foto uyikuye hehe?
Mama Firdaus: Nyikuye hano, ubanza ari wa musore wayisize hano. Urabona se uyu atari umukobwa wacu
Papa Firdaus: Ni we peee. Ni we rwose. Umukobwa wanjye. Ubu koko uyu mwana wacu nzongera kumubona nte?
Mama Firdaus: Mana niba koko waratubabariye, uzongere uduhuze n’umukobwa wacu. Twaramuhemukiye bikomeye ariko rwose twaricujije bihagije, tubabarire uzaduhuze na we rwose, kandi tukwijeje kuzamufata neza
Yabivugaga arira, ubona agaragaza kwicuza no kwihana muri we.
Ibyo byose bakibirimo, umusaza yahinduye ya foto ahita abona amagambo yanditseho
Yagiraga ati

Mumbabarire nababeshye, nababwiye inkuru y’umwana wanyu nyiyitirira ngo numve niba koko atarambeshye cyangwa mwaricujije. Ariho ni muzima, ariga neza, vuba aha nzamuzana abasure
Basomye ayo magambo bahita bahoberana, barushaho kumva ikiniga cy’ibyishimo.
Maurice aho yari ari, yahamagaye Samson
Maurice: Ngwino se nkubwire ahandi hantu tujyana mwana
Samson: ngusange hehe se boss
Maurice: Ngwino unsange hano moto zakatiye. Ubwo uzane n’indi moto iri buntware.
Samson: Turaje vuba ihangane turakugeraho mu minota micye
Noneho se kandi Maurice ashaka kujya hehe? Ese aba babyeyi koko barihannye cyangwa ni uko batamubona hafi?

Biracyaza…..

FIRDAUS: Agace ka 32

Baragiye bagera hafi y’aho bajyaga nuko bava kuri moto

Samson: Boss ni kuri iriya nzu rero ifite amabati atukura

Maurice: None se waje tukajyana?

Samson: Oya boss. Sinjya ngera muri ruriya rugo. Ahubwo nyihera agacupa motari ansubizeyo
Yakoze mu mufuka maze amuhereza inoti ya 5000 nuko amusaba kumusigira nimero ngo namukenera azamuvugishe, undi na we azimuha atazuyaje.
Maurice yatangiye kugenda agana rwa rugo, ariko yagendaga yibaza aho ari buhere abona amakuru yaje ashaka. Uko yatambukaga agenda nibwo igitekerezo cyaje kumuzamo, kandi yumvaga uko byamera kose umupango we ari bwo uri bugerweho neza bitamugoye.
Ubwo yageragayo, ntiyigoye akomanga ku irembo ahubwo yarombereje mu gikari, asuhuza ageze mu gikari, nuko Mama Firdaus aramwikiriza
Mama Firdaus: Uraho yewe mwa

Maurice: Muraho mama. Nabasabaga amazi yo kunywa

Mama Firdaus: Ko mbona se unaniwe mwana wanjye, urava he ukajya he

Maurice: Wa mubyeyi we ibyanjye ni birebire sinzi niba nabivuga nkabirangiza

Mama Firdaus: Reka nkuzanire amazi n’agatebe untekerereze
Yahise yihina mu nzu, asohokana igikombe cy’amazi n’agatebe k’agasongabugari nuko ahereza Maurice aricara
Yararetse arabanza anywa amazi, nuko amaze kuyanywa nibwo yamubajije
Mama Firdaus: Niko se, urava he ukajya he

Maurice: Mubyeyi rero, ubu nabuze aho ngana. Uku undeba ndi guturuka epfo iyoooo za Gikongoro

Mama Firdaus: Yego mwana wabuze se. Niko se, ni amahoro

Maurice: Amahoro se ya hehe wa mubyeyi we. Meze nk’impunzi mu gihugu cyacu ubu. Ahubwo mumbereye ababyeyi mwaba muncumbikiye mu gihe nshaka aho najya mpagasa

Mama Firdaus: Ese ko uvugira mu migani, ukavugana amaganya wa mwana we, tobora umbwire. Niyo ntacyo nakumarira ariko byibuze nagutega amatwi

Maurice: Amatwi ntatezwe na mama wambyaye, sinyategwe na data wanyibarutse se ubu koko ni wowe wayantega. Isi yaranyanze, isi yanyigirijeho nkana ariko sinzapfa

Mama Firdaus: mwana wa ko umutima wawe usobetswe n’amaganya koko? Aho ni amahoro ko ibikoba biri kunkuka. Cyo ngwino tujye mu nzu ubanze utuze.
Barinjiye mu nzu, maurice acyinjira yahise abona ifoto ya Firdaus imanitse muri salon iwabo. Byabonekaga ko ari ifoto yatunganyijwe nyuma, ariko ntiyabitinzeho ngo atavaho anabaza ibibyerekeye ataragera ku ntego ye. Nuko amaze kwicara arakorora buhoro
Maurice: Wa mubyeyi we rero, ndabona uri umubyeyi ungana na mama. Yego ntiwapfa guca urubanza rw’umuntu umwe, ariko nkubwije ukuri ubu umbona navuye ku Gikongoro n’amaguru mpunga mama na papa kandi ntacyo nabakoreye kibi.

Mama Firdaus: Mbwira nguteze yombi

Maurice: Navutse ndi imfura iwacu. Gusa kuva amenya ubwenge nta mahoro nigeze ngira kugeza ubwo natekerezaga ko ahari naba ntari umwana wabo. Ntibwiraga ntakubiswe, mama yahoraga andega kuri papa niyo nabaga ntakosheje. Najyaga kuvoma nahasanga umubyigano nataha ngakubitwa bakananyima ibiryo. Naba ngiye kwiga natinda gato nkina n’abandi bana ngatahira ku bitutsi n’inkoni. Nakuriye muri ubwo buzima, ku buryo no mu ishuri ntari nkibasha gutsinda neza, nuko ishuri nza kurivamo. Aho rero nari nzi ko mbikemuye ahubwo mba ndabihuhuye. Dore gukoreshwa nk’ifarashi. Mama, narakoze, ntunuka umugongo, ku buryo naryamaga meze nk’uwapfuye. Namaze rero kubona byose nta maherezo, nigira inama yo gutorongera nkazagwa ahandi kuko nubundi nari ndiho ntariho. Ni uko umbona ubu, sinzi ngo nderekeza hehe, sinzi ngo ndakora iki, ariko nyine Imana ni yo nkuru.
Mama Firdaus yamuteze amatwi atuje, gusa ukabona afite agahinda n’umubabaro mwinshi mu mutima.
Mama Firdaus: mwana wa, inkuru yawe inteye kongera kwibuka byinshi. Ubanza ari Imana yakuyoboye hano ngo inyibutse ubuhemu n’ubugome bwanjye.

Maurice: Gute se mama?

Mama Firdaus: Ntureba iriya foto (yavugaga amwereka ifoto ya Firdaus), uriya ni umukobwa wanjye kandi rwose nkurikije uko nkubona, muri mu kigero kimwe.

Maurice: None se yarapfuye mama?

Mama Firdaus: Yewe ntabwo mpamya ko akiri muzima ariko nanone kuba ntaramushyinguye sinzi ko nahamya ko yapfuye gusa hashize umwaka tumubuze
Yari akiri kumuganiriza nibwo Papa Firdaus yinjiraga, nuko umugore we amutekerereza ibyo umuhungu amaze kumubwira byose.
Umusaza yarimyoje, yikora mu mutwe, nuko
Papa Firdaus: Mwana wa. Ubujiji bwaduteye kwihekura tutabizi. Uku utureba twarakundanaga ariko tudafite gahunda yo kubana nuko nza gutera inda uyu ureba havukamo uriya mukobwa. Amategeko y’imiryango yatwemeje kubana, twe tukishyiramo ko uwo mwana atumye buri wese muri twe inzozi ze zitaba impamo. Noneho kuva twabana nta wundi mwana twongeye kubyara, twe tukiyumvisha ko wa mwana wavutse ari umuteramwaku, turamwanga karahava. Nta mpuhwe za kibyeyi twamweretse, nta rukundo nta kumwitaho ahubwo yari ameze nk’umuja mu rugo rwabo. Nuko umunsi umwe, nyina amubwira nabi atazi ko umwana yakuze. Natashye nsanga umwana adahari, nsanga yatwaye amafaranga ahagije na passeport ye idahari. Sinigeze nibaza aho yaba yarerekeje, gusa uko yakomezaga gutinda, naje kwigira inama njya ku kibuga cy’indege, ngezeyo mbabwira amazina ye n’itariki namuburiye, bambwira ko yafashe indege ijya Kenya. Aho natujemo buhoro nibwira ko atapfuye, ariko dore umwaka urashize. Nta makuru ye na macye nzi, nanayobewe uko nzinjira muri Kenya kumushakisha no kubaririza ibye, muri macye ubu nararize ndihanagura. Gusa ndicuza, byose ni ubujiji bwanjye.

Maurice: Yooo. Uwo mwana w’umukobwa ndumva duhuje akababaro. Nibe nawe yabonye uko atega indege naho jyewe n’igare sinabashije kuribona. None se papa, urumva amaherezo muzabonana

Papa Firdaus: mwana wa, simbizi kuko ari kure niba anariho. Ikindi sinzi niba akiri muri Kenya, niba yaragiye ahandi se, mbese nabuze ayo ncira mbura ayo mira. Niko se, wowe ubu ugiye kwerekeza hehe

Maurice: sinzi aho ndi bwerekeze gusa muncumbikiye iri joro narara ntekereza aho nerekeza.
Bamwemereye icumbi, nuko bamuha icyumba Firdaus yararagamo. Ubwo yakigeragamo yabanje gufata amafoto y’ibyo yasanzemo, nuko araryama. Yaraye yibaza niba ari bubibwire cyangwa se niba ari bubihorere na cyane ko amakuru yashakaga yari amaze kuyamenya.
Bwarakeye, arabyuka aritegura, yambara neza imyenda yari afite mu gakapu yagendanye, inkweto nziza, nuko asohoka aho yari yaraye.
Bakimukubita amaso babaye nk’abikanga kuko umuntu bari bacumbikiye yabonekaga nk’umukene washobewe ariko ubu wabonaga ari umwana wo mu bakire, ukeye rwose.
Maurice: mwaramutse babyeyi

Papa na mama Firdaus: Mwaramutse. Ko tubona wahindutse?

Maurice: erega ntabwo wahora usa nabi ngo unahorane agahinda. Ahubwo naraye nibaza. Umukobwa wanyu abaye akiriho, ubu mumubonye byagenda bite?
Papa Firdaus: Mwana wa. Uwamunyereka. Nabanza nkamusaba imbabazi, ubundi nkamwitaho birenze ndetse ibyo ntakoze mbere nkabikuba kabiri
Mama Firdaus: Ubu se koko umwana wanjye aracyariho? Simbizi pee. Gusa mubonye napfukama imbere ye sinahaguruka atampaye imbabazi. Ubu maze kumenya ko twamuhemukiye bishoboka.

Maurice: Mwakoze kuncumbikira rero, reka ngende nshake aho nya gupagasa. Muzakomeze mushakishe buriya muzamubona.
Maurice yaragiye, abandi na bo basigara aho ngaho
Ubwo mama Firdaus yajyaga mu cyumba umushyitsi yarayemo, yahise ahamagara umugabo we
Mama Firdaus: yewe muzeee, ngwino hano wirebere. Uriya mushyitsi ubanza yari gatumwa
Ni iki se abonye mu cyumba cya Firdaus? Ese nibamenya ko Maurice yaje ashaka amakuru bazishima cyangwa bazamunenga ko yabanetse?

Biracyaza……

FIRDAUS: Agace ka 31

Ubutumwa bwa Maurice narabusomye amarira aragwa, kuko numvaga nyobewe icyo gukora. Yari yanditse ati
Firdaus nkunda, iyi minsi simpari, kandi ntumbaze aho ngiye, ntuzanampamagare kuko ntabwo terefoni izaba iriho. Tuzavugana ngarutse
Nabusomye mfite ikiniga n’agahinda, nibaza niba atari uburyo bwo kunyicaho mu ibanga, cyangwa se akaba ashaka gusubirana na Keila
Bagenzi banjye babonye ko ntameze neza, bambaza icyo mbaye nanjye sinabahisha.
Ines: None se umuntu niho mugikundana, none ngo aho agiye ntashaka kuhakubwira, ngo nta no kumuhamagara koko? Ese wamuhamagaye biranga cyangwa ntiwabigerageje
Firdaus: None se wowe wabona buriya butumwa ukirirwa uhamagara koko?
Keila: Ariko ndumva udakwiye guhangayika. Burya abagabo bagira ibintu byo gushaka gutungura abakunzi babo, wasanga atari ubundi bugome cyangwa urwango ahubwo ashaka kuzakubwira ibyo agiye guhugiraho ari uko byamaze gutungana. Rero ndumva udakwiye guhangayika rwose.
Firdaus: Uzi ko nimero ye nyihamagaye ikaba iri gucamo we? Ariko ntari kwitaba sha
Ines: wihangayika ariko nawe. Buriya azagusobanurira impamvu yabyo
Twarasezeye kwa muganga nuko duherekeza Keila tumugeza iwabo, nanjye nsubira iwanjye dore ko nari nanahakumbuye.
Ubwo nageragayo nasanze ibintu bikiri uko nabisize, mbanza guhugira mu masuku, nuko ubwo nakoraga isuku naguye ku kinyamakuru, mbanza kwicara ndasoma dore ko gusoma ari kimwe mu bindanga.
Cyari ikinyamakuru kivuga ku rukundo, nuko nsomamo ibitandukanya urukundo n’amarangamutima.
Dore bimwe mu byo nasomyemo
1. Amarangamutima
Twese bitubaho kubona umuntu ukumva muri wowe uramukunze. Uko kumva umukunze ako kanya mu by’ukuri ntabwo byo ari rwo rukundo ahubwo ni amarangamutima. Uzasanga kugirango uwo muntu wumve muri wowe umukunze hari ikintu runaka kuri we kizaba cyagukuruye. Ushobora kuba wagiye mu kiliziya nuko umwe mu baririmbyi ukanezezwa n’uburyo ari kuririmba, ijwi rye se cyangwa ibimenyetso akoresha.
Ushobora kujya mu kabari nuko uwakwakiriye uburyo yakwitwayeho, yakwakiriye se, byahuza n’uko wifuza ukumva umugiriye amarangamutima.
Umukozi mukorana ashobora kuza yambaye uko adasanzwe yambara cyangwa akakwitwaraho uko atari asanzwe akwitwaraho nuko bikamugukururiraho.
Izi ni zimwe mu ngero zerekana amarangamutima dushobora rimwe na rimwe kwita urukundo.
Muri macye amarangamutima aza ako kanya kandi agira ikintu runaka cyaba gito cyangwa kinini kiyabyutsa.
Gusa amarangamutima burya niyo abyara urukundo
2. Urukundo
Ya marangamutima rero ntabwo tuyagaragaza mu buryo bumwe. Hari uyagira akayapfukirana cyane cyane iyo uwo yayagiriye abona ntaho bahurira. Hari n’uyagira akayagaragariza uwo yayagiriye. Uyu rero wagiriwe amarangamutima niwe ushobora gutuma abyara urukundo cyangwa se akagumya kuba amarangamutima gusa.
Akenshi amarangamutima agendana n’ibyo wowe wifuza kandi ukunda. Uwo wayagiriye iyo mufite ibyo muhuza bituma iminsi ya mbere itabagora dore ko muba musangiye byinshi. Iyi minsi ya mbere y’urukundo niyo iryoha ku bantu bose kuko muba muhararanye. Gusohokana, guhana impano, guhamagarana kenshi, n’ibindi binyuranye byo kubagarira urukundo nibyo byiharira amasaha yanyu menshi.
Aha muba mwumva nta cyabatanya ndetse urukundo rwanyu nta kizarurangiza.
Nyamara benshi kubera kutamenya urukundo icyo ari cyo birangira icyari urukundo gihindutsemo kwicuza no kubabara.
Kubera iki?
KUKO URUKUNDO ATARI AMARANGAMUTIMA GUSA.
Uwo ukunda umuhitamo mu gihe amarangamutima adahitamo. Nubwo bavuga ngo urukundo rujya aho rushatse, burya ni amarangamutima ajya aho ashatse noneho wowe ugahitamo kuyarekerayo cyangwa kuyakurayo. Urukundo rwo rusaba kwitanga n’umwanya no kwibaza icyo wakora ngo ntirurangire.
Akazi gakomeye mu rukundo gatangira iyo wiyemeje gukunda uwo muntu. Gufuha biraza, kubura amahoro kuko utazi aho ari n’amakuru ye bikiyongera, kwifuza ko yakuba hafi bikaza.
Ikosa benshi bakora ni ugushaka ko uwo ukunda aba uko ushaka, aba nkawe. Ntibishoboka. Urukundo rureba ibyiza by’uwo ukunda gusa niyo cyaba ari kimwe, nicyo witaho kuruta kureba amakosa ye, niyo yaba igihumbi. Ibuka ko wamukunze kuko ubihisemo, si uko wabitegetswe. Nubwo yaba ariwe wagusabye ko mukundana nta gahato washyizweho. Muri benshi babyifuzaga niwe gusa wemeye ko muba mu rukundo. Kwakira uwo ukunda uko ari niryo shingiro nyaryo ry’urukundo. Uko agukunda nibyo bizatuma we ubwe, ayibwirije agerageza kwisanisha n’uko uri cyangwa ushaka naho wowe ntacyo wakora ngo umuhindure. Kumubwira ibyo udakunda birahagije, ahasigaye we azifatira umwanzuro w’uko abyitwaramo.
Niba mu mibanire yanyu hari ikitagenda neza, aho kureba icyo mugenzi wawe atagukorera ahubwo reba wowe icyo ukwiye kumukorera. Dusabwa kutabera ikigeragezo abadukunda ahubwo tukababera inkingi.
URUKUNDO NYARUKUNDO NTIRUSHIRA NO MU BIHE BIBI RURAKOMEZA
Ese ubundi kuki ari we nkunda? Iki kibazo jya ucyibaza igihe cyose habaye kutumvikana ku kintu runaka hagati yanyu, bizagufasha kubisohokamo neza. Kuba ari we ukunda na we akaba ari wowe akunda, ni uko mwabihisemo, mwabyiyemeje. Ntibikwiye gusozwa n’intonganya no kubwirana amagambo akomeretsa no gushyira hanze ibyari amabanga y’urukundo rwanyu. Iyo bibaye byerekana ko mwakomeje kuzamura amarangamutima ntimuzamure urukundo.
GUKURURWA N’IKIMERO, IMYITWARIRE MU BURIRI, NI ZIMWE MU NGERO ZO GUSHYIRA IMBERE AMARANGAMUTIMA KURENZA URUKUNDO KANDI AKENSHI BIRANGIRA NABI.
Urukundo ni amahitamo. Duhitamo kureba ibyiza gusa, tukirengagiza ibibi, tugashaka ibyo tugomba kandi dukwiye gukorera uwo dukunda kandi tukibuka ko uwo twahisemo, tumukunda. Ibyo kubishyira imbere ni rwo rukundo kandi guharanira ko bikomeza gutyo niko kuguma mu rukundo.
Nasomye aya magambo numva ikiniga kiramfashe, nyoberwa aho amarira aturutse, nuko nkomeza kwihangana nkora amasuku ariko rwose nari nashengabaye. Koko nahise mbona ko namaze gukunda Maurice bitakiri amarangamutima. Nahereye ku bimaze akanya bibaye, kubera ubutumwa gusa nahise mbura amahoro, gucyeka ko ashobora gusubirana na Keila nabyo ubwabyo nta mahoro byampaye.
Urukundo burya rurayoboye kandi kuruhisha biragoye. Iyaba abantu bakundanaga ntirusaze ariko bijya bimbabaza kubona abakundanaga bari gusaba gatanya, ukibaza niba akaboko yamanitse asezerana yari yibeshye cyangwa yari yasinze cyangwa se ari uwo yiganaga.
Ibyo bitekerezo nabikomeje nkora amasuku kugeza ubwo nasozaga ibyo nakoraga, mpita njya mu gikoni gutegura ibyokurya dore ko bwari bugorobye. Gusa nakomeje guhangayika kuko ntari nzi aho Maurice wanjye aherereye ariko nanone niyumvisha ko nta kibi arimo, na cyane ko yamenyesheje nubwo atambwiye nyirizina aho agiye.
 *************************
TUGARUKE KURI MAURICE
Maurice: Bite mwana?
…: Ni byiza
Maurice: Jyewe nitwa Maurice, nturutse muri Kenya. Wowe se witwa nde?
…: Jyewe nitwa Samson, iwacu ni inaha
Maurice: None se Samson ko nshaka kukuyoboza
Samson: nta kibazo wanyoboza
Maurice (amwereka ifoto): Uyu mukobwa waba umuzi?
Samson: Eeeeh. Uyu si Kiragi ra? Ndamuzi ahubwo yarapfuye
Maurice: Urabizi neza se ko yapfuye?
Samson: Niko numvise iwabo bavuga, none se ko amaze umwaka urenga baramubuze ubwo koko ntiyapfuye?
Maurice: Iwabo se urahazi neza?
Samson: yego ndahazi ni hafi hano rwose
Maurice: None se wanjyanyeyo ukahanyereka
Samson: Dufate moto. Urampereza agacupa ariko mwana dore umvanye ku gasima
Maurice: Humura rwose nta kibazo
Bahise burira moto berekeza iwabo wa Firdaus
Maurice se aje gushaka ayahe makuru? Ese bari bumwakire neza cyangwa baramwishisha?

Biracyaza…..