Isesemi no kuruka: Ikibitera, igihe wajya kwa muganga n’uko wabyivura

Buri wese mu buzima bwe rimwe cyangwa kenshi byamubayeho kugira isesemi ndetse rimwe na rimwe igakurikirwa no kuruka. Nubwo akenshi iyo bitubayeho duhita tuvuga ko turwaye inzoka ariko burya ntabwo inzoka ari zo zonyine zishobora kugutera isesemi.

 

Isesemi ubwayo si indwara ahubwo ni ikimenyetso cy’uko mu buzima hari ibitagenda neza bitandukanye.

Muri iyi nkuru turavuga ku mpamvu zinyuranye zitera isesemi no kuruka, igihe usabwa kujya kwa muganga utazuyaje, ibyo wakora mu rugo

 

  1. Isesemi iterwa n’iki?

 

Isesemi nkuko twari tubivuze ituruka ku mpamvu imwe cyangwa nyinshi mu zikurikira:

 

 

  • Isesemi iterwa no kugenda mu modoka, ubwato cyangwa indege
  • Inda ikiri nto cyane cyane itarageza amezi ane (isesemi ifata abagore hagati ya 50% na 90% naho kuruka ni hagati ya 25% na 55%)
  • Imiti itera kuruka
  • Uburibwe bukabije cyane kandi bukamara igihe
  • Amarangamutima akabije nk’ubwoba, agahinda, kwiheba, stress, …
  • Uburwayi bw’agasabo k’indurwe
  • Uburozi cyangwa ibyokurya biroze
  • Mikorobi zanduza zinjira mu gifu
  • Kurya ukagwa ivutu
  • Impumuro runaka cyangwa umunuko runaka utabasha kwihanganira (igi ryaboze, umusuzi unuka…)
  • Kubona ikintu giteye ishozi (amashyira, ibyo umuntu yarutse cyangwa yitumye…)
  • Indwara z’umutima
  • Gukomereka ubwonko
  • Ibisebe
  • Kanseri zimwe na zimwe
  • Ibibazo binyuranye bifata imitekerereze
  • Ibiryo gutinda mu gifu cyane cyane ku barwaye diyabete
  • Kunywa inzoga nyinshi
  • Kuba ufite ibisebe mu nda haba mu gifu cyangwa amara
  • Kuba uri gufata imwe mu miti ya kanseri
  • Indwara ya appendicite

 

Gusa ibitera isesemi biratandukana hagendewe ku myaka. Ku bana bato ahanini isesemi no kuruka biterwa no kwandura indwara iva kuri virusi, kurya ibiryo byanduye, ubwivumbure ku mata, kugendera mu modoka, kugwa ivutu, inkorora, kuba amara yifunze cyangwa kurwara indwara imutera umuriro.

 

Aha nanone umwanya bitwara ngo isesemi ize kugutera kuruka uvuze ikintu kinini. Iyo bikubayeho ukimara kurya, akenshi biba bitewe n’ibyokurya byanduye. Nanone iyo bikubayeho hatarashira amasaha umunani uriye biterwa ahanini n’ibyo wariye byanduye. Gusa nanone habaho mikorobi zimwe zishobora kugutera ikibazo hashize igihe kinini zikwinjiye.

 

  1. Ni ryari usabwa kujya kwa muganga

 

Nubwo rimwe na rimwe iyo wagize isesemi byijyana cyangwa se ukivura ariko hari ibyo udasabwa kwihererana:

 

 

  • Iyo isesemi imaze iminsi irenga itanu kandi ukaba uruka kenshi
  • Iyo wagerageje kwivura ariko bikaba ntacyo bitanga
  • Iyo umaze umunsi urenga uruka kandi bikagendana n’impiswi
  • Iyo ku mwana muto uri munsi y’imyaka 6 kuruka bimaze amasaha kandi akaba ari guhitwa akanagaragaza ibimenyetso byo kubura amazi mu mubiri ndetse akanagira umuriro akaba amaze n’amasaha 6 ataranyara

Uretse ibi kandi usabwa kwihutira kujya kwa muganga iyo:

  • Ibyo warutse harimo amaraso
  • Uri kubabara umutwe cyane kandi ijosi riremereye
  • Wumva uri kuzungera
  • Uri kuribwa mu nda cyane
  • Uruka ukanahitwa
  • Uri guhumeka insigane kandi umutima utera indihaguzi

  1. Ibyo wakora ukivura isesemi

 

Mu gihe wagize isesemi kandi ukaba udafite ibimenyetso bituma ukenera guhita ujya kwa muganga hari ibyo wakora ubwawe bikagufasha kuba wakira isesemi no kuruka. Muri byo twavuga:

 

  • Tangawizi: tangawizi ushobora kuyihekenya cyangwa se ugakora icyayi ukayishyiramo. Gusa mu gihe utwite usabwa kudakoresha nyinshi cyangwa kutayikoresha cyane. Abandi batayemerewe ni abafite umuvuduko w’amaraso uri hasi cyane ndetse n’abafite isukari nkeya mu maraso kimwe n’abafata imiti ibuza amaraso kuvura
  • Indimu: indimu wayikoresha nayo mu buryo bunyuranye. Niba ugira ikibazo mu gifu kubera indimu ushobora gukata indimu noneho ukayihumuriza cyangwa ukayikanda umwuka wayo ukazamukira mu mazuru. Naho niba nta kibazo cy’igifu ugira wayirya cyangwa ugakamurira umutobe wayo mu mazi ukayanywa

Published by

BIRAMAHIRE Francois Jassu

BIRAMAHIRE Francois afite impamyabumenyi yo ku rwego rwa kaminuza mu byerekeye imiti ndetse yanahawe amahugurwa anyuranye ku mirire n'ubuzima rusange. Akunze kwandika inkuru zerekeye ubuzima muri rusange, imibanire, imirire iboneye, indwara n'imiti.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s