Dusobanukirwe indwara ya Bartholinite

Nubwo iri jambo ushobora kuba ari ubwa mbere uryumvishe, nyamara ubu ni bumwe mu burwayi bushobora gufata abagore cyangwa abakobwa gusa bukaba bakunze gufata abagore bakiri bato kurenza ko bwafata abageze mu zabukuru.

Muri iyi nkuru turavuga ikibutera, aho bufata, uko wabwirinda.

Bartholinite ni iki?

Iyo havuzwe Bartholinite haba havugwa kubyimba kw’imvubura ya Bartholin. Iyi ni imvubura ingana hafi na santimetero imwe, ikaba imvubura iboneka muri buri ruhande rw’umwinjiro w’igitsina cy’umugore. Izi zikaba imvubura zirekura amatembabuzi ashinzwe guhehereza igitsina cy’umugore (ububobere).

Izi mvubura rero ziri mu mvubura zirekura amatembabuzi asohoka hanze (glandes exocrines) aya matembabuzi yo ntiyitwa imisemburo kuko imisemburo irekurwa na glandes endocrines.

Izi mvubura rero haba igihe umuyoboro usohora ya matembabuzi wifunga nuko aho gusohora ya matembabuzi hanze ahubwo agaheramo nuko akahatera kubyimba. Nibyo byitwa rero Bartholinite.

Iyi Bartholinite ni ububyimba ariko si ikibyimba, gusa iyo ukoze ku mwinjiro w’igitsina uba wumva hari agaturugunyu. Gusa igitangaje ni uko bifata uruhande rumwe gusa, urundi rukaba ruzima. Rero ubusanzwe ntikaba kababaza ariko iyo hinjiyemo bagiteri hazamo ubwandu bikagendana no kubabara n’ibindi turi bubone.

Ifata uruhande rumwe

Ni iki gitera iyi ndwara

Nkuko twabivuze iyi ndwara ni ukubyimba kw’imvubura za Bartholin. Uku kubyimba rero bikaba bishobora guturuka ku mpanuka ituma hifunga bitunguranye, gusa nanone ahanini bikaba bituruka ku ndwara zituruka ku mibonano mpuzabitsina nk’imitezi, mburugu, chlamydia cyangwa izindi bagiteri nka Escherishia coli.

Ibimenyetso

Kenshi iyo aka kabyimba kakiri gato kandi kakaba katarageramo ubwandu ntabwo wakumva. Uko kagenda kiyongera rero (kuko imvubura ntiyahagaze gukora) ushobora noneho kumva ikintu kibyimbye hafi y’umwinjiro w’igitsina. Niyo waba wumva utababara ariko uba wumva bibangamye. Uretse ibi rero iyo hajemo ubwandu ibindi bimenyetso twavuga:

  • Kubabara no kokerwa hafi y’umwinjiro w’igitsina
  • Kubangamirwa wicaye cyangwa uri kugenda
  • Kubabara uri gukora imibonano mpuzabitsina
  • Umuriro uri hejuru ya dogere 38.

Nkuko twabivuze iyi ndwara ikunze gufata abagore bafite imyaka iri hagati ya 20 na 30, ariko bakora imibonano mpuzabitsina. Iyi ndwara ntifata abakobwa bakiri bato kuko utaragera mu bwangavu iyi mvubura iba itaratangira gukora. Ntikunze kandi kuboneka ku bamaze gucura kuko iyo umugore yacuze iyi mvubura igabanya ingufu zo gukora igasigara ikora gacye cyane.

Iyi ndwara rero niwisuzuma (ukanda igitsina ku mpande ukoresheje igikumwe na mukubitarukoko, igikumwe kirimo imbere naho mukubitarukoko iri inyuma) ukumva ako kabyimba karimo uzagana muganga akore isuzuma rirenzeho anafate ibizami ubundi uvurwe, aho ushobora guhabwa imiti yo kunywa gusa cyangwa se ukabagwa noneho bagakuramo aharwaye.

Kuyirinda ni gute

Kwirinda mu buryo bwa mbere ni ukwirinda ibishobora kwirindwa ku ruhande rwawe. Kwirinda gukora imibonano n’abagabo benshi wanayikora ukibuka agakingirizo kandi warwara indwara zandurira mu mibonano mpuzabitsina ukivuza hakiri kare.

Published by

BIRAMAHIRE Francois Jassu

BIRAMAHIRE Francois afite impamyabumenyi yo ku rwego rwa kaminuza mu byerekeye imiti ndetse yanahawe amahugurwa anyuranye ku mirire n'ubuzima rusange. Akunze kwandika inkuru zerekeye ubuzima muri rusange, imibanire, imirire iboneye, indwara n'imiti.

6 thoughts on “Dusobanukirwe indwara ya Bartholinite”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s